АҚШнинг Миссури штати губернатори қатлдан бир неча соат аввал 2001 йилда журналист аёл Лиша Гейлни ўлдиргани учун судланган Марселлус Уильямсга нисбатан ўлим жазоси ижросини тўхтатишни буюрди, деб ёзади Meduza.
Уильямс 1998 йилда St. Louis Post-Dispatch газетаси журналисти Лиша Гейлни ўлдирганликда айбланиб, ҳибсга олинган эди. Ўз уйида ўлик ҳолда топилган Гейлнинг танасида пичоқ билан берилган 43 та жароҳатни аниқлашди. Тергов версиясига кўра, Гейл душда бўлган вақтда Уильямс унинг хонадонига ўғриликка тушган, аммо аёл ўғрини пайқаб қолгач, уни тўхтатишга ҳаракат қилган. 2001 йилда маслаҳатчилар суди уни ўлим жазосига маҳкум этди.
Уильямс ўз айбини тан олмади, унинг адвокатлари эса айбловчи томон унинг қотиллика алоқадорлиги ҳақида етарлича далилларни келтирмаганлигини таъкидлади. Уильямсга нисбатан ҳукм устидан кўп марта шикоят аризаси берилди. Охир-оқибат, 2015 йил январида Миссури штати Олий суди адвокатларга ДНК-экспертиза ўтказиш учун имконият бериш мақсадида, ҳукмни ижро этишни тўхтатиб туриш ҳақида қарор қабул қилди.
Адвокатлар сўзларига кўра, ДНК-экспертиза Уильямс Гейлнинг ўлимида айбдор эмаслигини кўрсатди. Жиноят жойидан топилган биоматериаллар таҳлили улар шахси аниқланмаган бошқа эркакка тегишли эканлигини кўрсатди. Экспертиза натижалари билан танишиб чиққач, Олий суд ҳеч қандай изоҳларсиз Уильямсга нисбатан ўлим жазосини бекор қилишдан бош тортди.
Штатда 22 август куни ижро этилиши керак бўлган ўлим жазосига қарши кампания авж олиб кетди, тегишли петицияни 200 мингдан ортиқ киши имзолади. Натижада қатлга бир неча соат қолганида штат губернатори ўлим жазосини тўхтатишини эълон қилди.
Губернатор Уильямсни афв этишдан бош тортди ва унинг ишини таҳлил қилишни махсус комиссияга топширганини айтди.
Изоҳ (0)