18 август куни «Ўзбекистон» телеканалига директор этиб тайинланган Хайрулла Нуриддинов уч кундан сўнг яна Ўзбекистон Миллий телерадиокомпанияси раиси биринчи ўринбосари этиб қайта тайинланди. Бу ҳақда «Ўзбекистон 24» телеканали хабар бермоқда.
18 август куни ЎзМТРК раиси биринчи ўринбосари лавозимида ишлаб келаётган Хайрулла Нуриддинов «Ўзбекистон» телеканали директори этиб тайинлангани, унинг ўрнига Баҳодир Юнусов биринчи ўринбосар вазифасини бажарувчига айлангани маълум бўлган эди.
UZ24’нинг ёзишича, Хайрулла Нуриддинов биринчи ўринбосарликка қайтгани ортидан Баҳодир Юнусов «Ўзбекистон» телерадиоканалига директор этиб тайинланган. Қайд этиш жоиз, Хайрулла Нуриддинов биринчи марта 2017 йил февралида МТРК раиси биринчи ўринбосари этиб тайинланган эди.
Нуриддинов нима учун уч кун аввал «Ўзбекистон» телерадиоканалига бошлиқ этиб тайинланиб, сўнг яна ЎзМТРК биринчи ўринбосарлигига қайтарилгани сабаблари ҳозирча номаълум.
«Ўзбекистон 24»нинг қўшимча қилишича, Нусрат Ҳикматуллаев МТРК раисининг техник масалалар бўйича ўринбосари этиб тайинланган. Мазкур лавозимда бунгача Шуҳрат Расулов меҳнат қилиб келаётган эди.
Изоҳ (0)