2017 йилнинг 21 август куни Деҳли шаҳрида Ўзбекистон Республикаси ҳукумати делегациясига бошчилик қилаётган Ташқи ишлар вазири Абдулазиз Комилов Ҳиндистон илм-фан ва маданият вакиллари билан учрашди, деб хабар берди Ташқи ишлар вазирлиги матбуот хизмати.
Суҳбатда Жаваҳрлаъл Неру номидаги университет, Ислом миллий университети, Унитй Foundation Делҳи ижтимоий-маданий ташкилоти, Ҳиндистон Ташқи ишлар вазирлигининг Маданий алоқалар бўйича ҳинд кенгаши етакчи олимлари, Бобур номидаги халқаро жамғарма фаоллари иштирок этди.
Учрашувда маданий-гуманитар муносабатлар, Ўзбекистон ва Ҳиндистон фан ва таълим муассасалари ўртасида бевосита алоқаларни кенгайтириш ва мустаҳкамлаш масалалари юзасидан фикр алмашилди.
Таъкидланганидек, ўзбек ва ҳинд халқлари тарихи, адабиёти, мусиқаси, рассомчилик ва архитектураси, уларнинг бир-бирини бойитиши ва тўлдириши буюк давлат арбоби Заҳириддин Муҳаммад Бобур ҳамда унинг авлодлари номи билан чамбарчас боғлиқ. Уларнинг ўчмас мероси икки томонлама муносабатларни мустаҳкамлаш, Ўзбекистон ва Ҳиндистон ўртасида кўп асрлик савдо, фан, маданият соҳаларидаги самарали алмашинув анъанасини давом эттириш учун кучли салоҳият яратади.
Илиқ ва ўзаро ҳурмат руҳида ўтган учрашувда ҳамкорликни кенгайтириш юзасидан аниқ таклифлар айтиб ўтилди.
Изоҳ (0)