Иш режаси тасдиқлангани сабаб, Андижон вилоятидаги Асака шаҳрида жойлашган GM Uzbekistan автомобиль заводида 22 августдан ҳар йилги режавий профилактика ишлари бошланади. Бу ҳақда компания Facebook’даги расмий саҳифасида хабар берди.
Ушбу тадбирлар доирасида асосий ва ёрдамчи технологик жиҳозлар, коммунал хўжалик, муҳандис-коммуникацион тармоқларнинг профилактик текшируви ҳамда техник хизмати ўтказилади. Шунингдек, корхонани куз—қиш мавсумига тайёрлаш доирасида режавий таъмирлаш ишлари олиб борилади.
Таъкидланишича, GM Uzbekistan АЖнинг тайёр маҳсулотларни вақтида ва тўлиқ ҳажмда етказиб бериш бўйича шартномадаги барча мажбуриятлари ўз вақтида бажарилади. Режавий профилактика ишларини амалга ошириш автомобилларни етказиб бериш бўйича аввалроқ шартномада қайд этилган жадвалга таъсир кўрсатмайди.
2017 йилнинг 11 сентябридан бошлаб заводда автомобиль ишлаб чиқариш қайта йўлга қўйилади.
Изоҳ (0)