Шарлотсвилл мэри АҚШда ирқчилар фаоллашишида Трампни айблади
Американинг Виржиния штати Шарлотсвилл шаҳри мэри Майк Сигнер АҚШда ирқчилик типидаги уюшмаларнинг фаоллиги ўсиши юзасидан масъулиятни президент Дональд Трамп бўйнига қўйди. Бу ҳақда демократ шаҳар мэри CNN телеканали эфирида маълум қилди, деб ёзади «ТАСС».
«У қандай сайловолди кампаниясини ўтказганига қаранг, оқтанли ирқ устунлиги тарафдорлари, оқтанли миллатчи гуруҳлар, антисемит (яҳудийларга қарши) гуруҳлар томонидан аниқ бир мақсадга қаратилган тилёғламаликка эътибор қаратинг», — дея таъкидлади у.
Мэр қайд этишича, республикачи Трампнинг маъмурияти ўта ўнглар вакилларига «аралаша олмаслигини, уларни қоралай олмаслигини, танқид қила олмаслигини, жим қила олмаслигини» бир неча маротаба намойиш қилган.
Сигнер «антисемитлар, неонацистлар, Ку-клукс-кланларнинг барчаси доим сояда бўлгани»ни айтди. Унинг таъкидлашича, Трамп сайловда ғолиб чиққанидан кейин ўта ўнгларда «ёруғликка чиқиш» учун имконият пайдо бўлган.
12 август куни шаҳарда миллатчилар намойиш уюштирди. Ёш йигит уларнинг устига машина ҳайдаши оқибатида бир киши ҳалок бўлди, 19 киши яраланди. Кейинроқ йигит қўлга олиниб, унга нисбатан айблов илгари сурилди.
