Amerikaning Virjiniya shtati Sharlotsvill shahri meri Mayk Signer AQShda irqchilik tipidagi uyushmalarning faolligi o‘sishi yuzasidan mas’uliyatni prezident Donald Tramp bo‘yniga qo‘ydi. Bu haqda demokrat shahar meri CNN telekanali efirida ma’lum qildi, deb yozadi “TASS”.
“U qanday saylovoldi kampaniyasini o‘tkazganiga qarang, oqtanli irq ustunligi tarafdorlari, oqtanli millatchi guruhlar, antisemit (yahudiylarga qarshi) guruhlar tomonidan aniq bir maqsadga qaratilgan tilyog‘lamalikka e’tibor qarating”, — deya ta’kidladi u.
Mer qayd etishicha, respublikachi Trampning ma’muriyati o‘ta o‘nglar vakillariga “aralasha olmasligini, ularni qoralay olmasligini, tanqid qila olmasligini, jim qila olmasligini” bir necha marotaba namoyish qilgan.
Signer “antisemitlar, neonatsistlar, Ku-kluks-klanlarning barchasi doim soyada bo‘lgani”ni aytdi. Uning ta’kidlashicha, Tramp saylovda g‘olib chiqqanidan keyin o‘ta o‘nglarda “yorug‘likka chiqish” uchun imkoniyat paydo bo‘lgan.
12-avgust kuni shaharda millatchilar namoyish uyushtirdi. Yosh yigit ularning ustiga mashina haydashi oqibatida bir kishi halok bo‘ldi, 19 kishi yaralandi. Keyinroq yigit qo‘lga olinib, unga nisbatan ayblov ilgari surildi.
Izoh (0)