Учувчисиз учадиган йўловчи самолётлар яқин вақт ичида реалликка айланиши мумкин. Бу ҳақда UBS банки томонидан ўтказилган таҳлилга эътибор қаратган «Коммерсантъ» газетасига таяниб, «РИА Нововсти» хабар берди.
Масофадан бошқариладиган биринчи самолётлар 2025 йилда пайдо бўлиши мумкин. Бундай лайнерлар авиакомпанияларга 35 миллиард долларгача тежаш имконини беради. Биринчи ўринда учувчилар иш ҳақи харажатлари камаяди.
Масофадан бошқариладиган самолётлар йўловчилар томонидан ҳам яхши кутиб олиниши мумкин: бу чипталар нархини 10 фоиз арзонлаштиришга имкон беради.
Учувчисиз технологияларни ишлаб чиқарувчи компаниялар орасида Boeing ҳам бор. Корпорация ишлаб чиқараётган тизимда учувчининг ўрнини сунъий интеллект эгаллайди.
Бироқ сўровда иштирок этган йўовчиларнинг 54 фоизи, чипталар нархи арзон бўлса ҳам, учувчисиз ҳаво кемасида учмаслигини айтган.
Авиация соҳасида янги технология истиқболига ишонмайдиганлар ҳам бор. «Учувчи кабинасининг автоматлашуви янги нарса эмас — у аллақачон қўлланилмоқда. Бироқ автоматика керакли ишни қилмаган пайтда учувчилар унинг ишига аралашади», — деб ўтган Британия фуқаролик авиацияси учувчилари ассоциациясининг парвозлар хавфсизлиги бўйича эксперти Стив Ланделлс.
Изоҳ (0)