Таиланд ҳукумати Facebook ва YouTube’нинг провайдерларига мазкур компаниялар веб-саҳифаларни блок қилиш ҳақидаги талабларни бажармагани учун, ултиматум эълон қилди. Бу ҳақда «РБК» хабар бермоқда.
Компаниялар ноқонуний контент жойлаштирилган деб топилган веб-саҳифаларни 7 август, душанба кунига қадар ўчириб ташлаши керак. Агар талаб бажарилмаса, YouTube, Facebook ва бошқа ижтимоий тармоқларнинг Таиланддаги провайдерларига қонун бўйича чора кўрилади, хусусан, уларнинг лицензиялари олиб қўйилиши мумкин.
Таиланд ҳукумати жами 1700 та саҳифанинг ўчириб ташланишини талаб қилмоқда.
«Мазкур интернет-провайдерлар Таиландда рўйхатдан ўтган ҳамда улар Таиланд қонунлари ва судлари буйруқларига риоя этиши зарур», — деди Миллий радиоэшиттиришлар ва телекоммуникациялар комиссияси раҳбари Такорн Тантасит.
Bangkok Post нашрининг тахминига кўра, ҳукумат мазкур талаблари орқали Facebook ва YouTube’га билвосита таъсир ўтказишга уринмоқда. Аввалроқ Такорн Тантасит бевосита Facebook ва YouTube’га мурожаат қилиб, монархияни ҳақоратловчи веб-саҳифаларни ўчириб ташлашни талаб қилган эди, бироқ бундан натижа чиқмаган.
Изоҳ (0)