Трамп Шимолий Кореяга превентив зарба бериш имкониятини муҳокама қилишдан бош тортди

АҚШ президенти Дональд Трамп АҚШнинг Шимолий Кореяга превентив зарба бериш имкониятини муҳокама қилишдан бош тортди, деб ёзади «Газета.ru».

«Биз бу ҳақда ҳеч қачон гапирмаймиз. Ҳеч қачон», — деди у АҚШ биринчи бўлиб зарба бера олиш-олмаслиги ҳақидаги саволга жавобан.

Шу билан бирга, Америка етакчиси АҚШ фуқаролари ва Вашингтоннинг иттифоқдошлари хавфсизликда эканлигини қўшиб қўйди.

Эслатиб ўтамиз, Корея халқ армияси АҚШнинг Тинч океанидаги Гуам оролида жойлашган ҳарбий объектларига, шу жумладан, B-52 стратегик бомбардимончилари жойлашган Андерсен авиабазасига  превентив ракета зарбасини бериш режасини ишлаб чиқаётгани хабар берилган эди.

Кейинроқ Пентагон президент Дональд Трамп тегишли буйруқ берган тақдирда, Шимолий Корея ракета объектларига превентив зарбалар бериш режасини тайёрлаб қўйгани маълум қилинди.

Шундан кейин КХДР ҳарбийлари Гуам оролидаги Америка ҳарбий базалари жойлашган ҳудудга ракетали зарба бериш режасини август ўрталарида ишлаб чиқиш ниятини маълум қилди.