АҚШ давлат департаментининг расмий вакили Хизер Ноерт Россия президенти Владимир Путиннинг Абхазияга ташрифини номақбул дея атади. Унинг таъкидлашича, республика Москва томонидан «оккупация қилинган», деб хабар берди «MK.ru».
«АҚШ президент Владимир Путиннинг Россия томонидан оккупация қилинган Грузия ҳудудига ташрифини номақбул дея ҳисоблайди», — деди Ноерт брифинг давомида.
АҚШ Давлат департаменти вакилининг қўшимча қилишича, бу ҳаракат билан Кремль Женеванинг Кавказорти бўйича музокараларини бузган.
Шунингдек, Вашингтоннинг маълум қилишича, Россия 2008 йилда ўт очишни тўхтатиш борасидаги битимга мувофиқ ўз қўшинларини урушдан олдинги позициясига олиб чиқиб кетишини, шу билан бирга Абхазия ва Жанубий Осетиянинг тан олинган мустақиллигини бекор этишни талаб қилди.
Эслатиб ўтамиз, Россия Грузия ва Жанубий Осетияга қарши кечган урушдан сўнг иккита республиканинг мустақиллигини тан олган эди.
Изоҳ (0)