Ўзбекистон Президенти Шавкат Мирзиёев қурилиш соҳаси вакилларига табрик йўллади. Табрик матни «Ўзбекистон 24» телеканалининг сайтида келтирилди.
«Аввало, сиз, азизларни — уста бинокорлар, меъмор ва лойиҳачиларни, пудратчи ташкилотлар вакиллари ҳамда фахрийларни, ушбу тизимга дахлдор барча юртдошларимизни мамлакатимизда илк бор нишонланаётган қутлуғ сана — Қурилиш соҳаси ходимлари куни билан чин қалбимдан самимий табриклаб, барчангизга чуқур ҳурматим ва эзгу тилакларимни изҳор этаман», — деган табрик сўзлари билан бошланади мурожаат.
«Ғоят масъулиятли ва шарафли касб бўлган қурувчилик ҳақида гап кетганда, аввало сизларнинг фидокорона меҳнатингиз билан бунёд этилган улкан корхона ва иншоотлар, шинам уй-жойлар, узоғимизни яқин қиладиган равон йўл ва кўприклар, таълим-тарбия, тиббиёт, маданият ва спорт масканлари, обод шаҳар ва қишлоқлар кўз ўнгимизда намоён бўлади».
«Бир сўз билан айтганда, бугунги гўзал ва фаровон ҳаётимизни, мамлакатимизнинг келгуси тараққиётини қурилиш соҳасидан, сиздек олижаноб касб эгалари меҳнатидан айри ҳолда тасаввур этолмаймиз».
Таъкидланишича, мустақиллик йилларида амалга оширилган кенг кўламли ислоҳотлар натижасида мустаҳкам ҳуқуқий-меъёрий, моддий-техник базага, улкан кадрлар салоҳиятига эга бўлган мазкур кўп тармоқли соҳа тараққиёт локомотивларидан бирига айланди.
Ҳозирги кунда мамлакатда 24 мингга яқин қурилиш-пудрат ва 950 тадан зиёд лойиҳа ташкилотлари, 8 мингта қурилиш материаллари ишлаб чиқарадиган корхона фаолият кўрсатмоқда. Уларда турли миллатга мансуб минг-минглаб малакали ишчилар, муҳандис-техник ходимлар, мутахассислар меҳнат қилмоқда.
Кейинги ўн йилнинг ўзида қурилиш соҳасида инвестиция лойиҳалари доирасида 196,6 триллион сўмлик капитал қўйилмалар ўзлаштирилган, марказлаштирилган молиявий манбалар ҳисобидан 20 мингдан зиёд объект, жумладан, 7440 та умумтаълим мактаби, 1824 та касб-ҳунар коллежи ва академик лицей, 1951 та болалар спорти иншооти, 949 та шифохона ва 3708 та ичимлик суви объекти барпо этилган, чет эл кредитлари эвазига 40,3 миллиард долларлик инвестиция лойиҳалари амалга оширилган.
Сўнгги ўн йилда 1308 та қишлоқ массивида намунавий лойиҳалар асосида 69557 та ҳар томонлама қулай уй-жойлар барпо этилиб, 83500 оиланинг яшаш шароити тубдан яхшиланди. Барча вилоятлар марказларида 191 та, Тошкент шаҳрининг Сирғали туманида 102 та, қишлоқ жойларда эса 15 мингта ана шундай уй-жойлар жадал суръатлар билан барпо этилмоқда.
«Шу билан бирга, бугун олдимизда қурилиш соҳасида ҳал қилиниши лозим бўлган бир қатор долзарб масалалар тургани, уларга ечим топиш, мавжуд муаммоларни ўз вақтида ҳал этиш муҳим ҳаётий вазифаларимиздан бири эканлигини яхши англашимиз зарур», — таъкидлади давлат раҳбари.
«Сизларни касб байрамингиз билан яна бир бор чин қалбимдан табриклаб, барчангизга сиҳат-саломатлик, олижаноб фаолиятингизда ва шахсий ҳаётингизда ютуқ ва омадлар, оилаларингизга бахту саодат, файзу барака тилайман. Ҳеч қачон чарчаманг, машаққатли ва шарафли меҳнатингизнинг роҳатини кўринг, азиз дўстлар!», — деб сўзига якун ясади Шавкат Мирзиёев.
Изоҳ (0)