Швейцариядаги Лавертеццо қишлоғининг видеоси ижтимоий тармоқларда тарқалгач, бу ер ҳақиқий туристик марказга айланди. Бунга италялик Марко Капедри сабабчи, деб ёзади TravelAsk .
Шу қишлоқда ҳордиқ чиқарган Марко, Лавертеццонинг ажойиб пейзажларини видеога олиб, уни 10 июль куни Facebook’даги саҳифасига жойлаштирган. Ҳозирда бу ролик уч миллион мартага яқин томоша қилинди.
Лавертеццо сайёрадаги энг тоза дарё — Верзаска яқинида жойлашган. Видеодан сўнг бу ерга ташриф буюрувчи сайёҳлар сони, айниқса, Марконинг ватандошлари сезиларли даражада ошди.
Бироқ маҳаллий аҳоли бу каби машҳурликдан у қадар хурсанд эмас: айрим сайёҳлар ўзларига ярашмайдиган қилиқлар қилиб, ярим яланғоч сайр қилмоқда, чиқиндилар ташламоқда ва водийни «очиқ осмон остидаги ҳожатхонага» айлантирмоқда.
Ўз навбатида Лавертеццо мери Роберто Баччиаринининг маълум қилишича, вазият назорат остида. Бундан ташқари амалдор қишлоқни машҳур қилиб юборган Маркони мақтаб ҳам қўйди. Бироқ Робертонинг қўшимча қилишича, Каперди ўз ватандошларидан қоидаларни бузмасликни ҳамда ўзларини муносиб тутишларини сўраб қўйса, яхши бўларди.
Изоҳ (0)