Shveysariyadagi Lavertetsso qishlog‘ining videosi ijtimoiy tarmoqlarda tarqalgach, bu yer haqiqiy turistik markazga aylandi. Bunga italyalik Marko Kapedri sababchi, deb yozadi TravelAsk .
Shu qishloqda hordiq chiqargan Marko, Lavertetssoning ajoyib peyzajlarini videoga olib, uni 10-iyul kuni Facebook’dagi sahifasiga joylashtirgan. Hozirda bu rolik uch million martaga yaqin tomosha qilindi.
Lavertetsso sayyoradagi eng toza daryo — Verzaska yaqinida joylashgan. Videodan so‘ng bu yerga tashrif buyuruvchi sayyohlar soni, ayniqsa, Markoning vatandoshlari sezilarli darajada oshdi.
Biroq mahalliy aholi bu kabi mashhurlikdan u qadar xursand emas: ayrim sayyohlar o‘zlariga yarashmaydigan qiliqlar qilib, yarim yalang‘och sayr qilmoqda, chiqindilar tashlamoqda va vodiyni “ochiq osmon ostidagi hojatxonaga” aylantirmoqda.
O‘z navbatida Lavertetsso meri Roberto Bachchiarinining ma’lum qilishicha, vaziyat nazorat ostida. Bundan tashqari amaldor qishloqni mashhur qilib yuborgan Markoni maqtab ham qo‘ydi. Biroq Robertoning qo‘shimcha qilishicha, Kaperdi o‘z vatandoshlaridan qoidalarni buzmaslikni hamda o‘zlarini munosib tutishlarini so‘rab qo‘ysa, yaxshi bo‘lardi.
Izoh (0)