Алишер Усмонов йил бошидан буён 1,77 млрд долларга бойиди

Россиялик 27 нафар долларли миллиардерларнинг умумий капитали 2017 йилнинг январидан августигача 10,14 миллиард долларга кўпайди, деб ёзади «ТАСС» Bloomberg Billionaires Index’га таяниб.

27 нафар россиялик миллиардерларнинг 21 нафари бойиди. Россиянинг энг бой одами, «Северсталь» ОАЖ асосий акциядори Алексей Мордашов  бу давр ичида ўз  бойлигини 354 миллион долларга оширди. Россиялик миллиардерлар рўйхатида иккинчи ўринни эгаллаб турган Владимир Потанин, «Интеррос» президенти ва «Норильский никель» бошқарув раиси 16,6 миллион долларга бойиди.

Ўз давлатини энг кўп миқдорда кўпайтирганлар — Новолипецк металлургия комбинати директорлар кенгаши раҳбари Владимир Лисин (1,84 миллиард долларга кўпайтирган), USM Holdings асосий акциядори Алишер Усмонов (1,77 миллиард долларга) ва «Русал» ва En+ Group президенти Олег Дерипаска (1,76 миллиард долларга) бўлди.

2017 йилнинг илк етти ойи ичида энг кўп пул йўқотганлар эса — «Новатек» раҳбари Леонид Михельсон (2,09 миллиард доллар), Volga Group асосчиси ва эгаси Геннадий Тимченко (1,92 миллиард доллар) ва «Лукойл» ОАЖ президенти Вагит Алекперов (1,13 миллиард доллар) бўлди.