«Ўзбекистон ҳаво йўллари» Миллий авиакомпаниясининг Boeing 787 Dreamliner самолёти 27 июль соат 08:40 да Ислом Каримов номидаги Тошкент халқаро аэропортидан Нью-Йоркка тўғридан-тўғри парвозни бошлади. Бу ҳақда Миллия авиакомпания ахборот хизмати маълум қилди.
«Бу биринчи тўхтовсиз рейс мамлакат фуқаролик авиацияси ҳаётида тарихий ҳодиса ва Ўзбекистон миллий авиаташувчиси ривожининг янги босқичи ҳисобланади», — дейилади компания хабарида.
Нью-Йоркка тўғридан-тўғри рейс 13 соат давом этади. Парвозни «Ўзбекистон ҳаво йўллари» МАК экипажи амалга оширмоқда. Экипаж таркибида парвоз комплекси директори ўринбосари Сергей Ким, авиакомпания бош штурмани Станислав Гурфинкел, Boeing 787 парвоз комплекси командири Асаджон Турсунов, иккинчи учувчилар Рустам Қўрғонов ва Олимжон Узоқов бор.
Миллий авикомпаниянинг бортида 237 нафар йўловчи бўлган самолёти Жон Кеннеди номидаги халқаро аэропортга маҳаллий вақт билан 21:30 да қўнади.
«Орзулар лайнери»ни Нью-Йоркдан Тошкентга ҳаво кемаси командири Павел Моргачев, Boeing 787 парвоз отрядининг учувчи-инструктори Алексей Маркин ва иккинчи учувчи Улуғбек Ишмуҳамедов бошқариб келади.
Шу муносабат билан Тошкент—Нью-Йорк—Тошкент йўналиши бўйича биринчи тўхтовсиз парвозни амалга оширган Миллий авиакомпания Dreamliner’ини тантанали кутиб олиш маросими бўлиб ўтади.
Изоҳ (0)