“O‘zbekiston havo yo‘llari” Milliy aviakompaniyasining Boeing 787 Dreamliner samolyoti 27-iyul soat 08:40 da Islom Karimov nomidagi Toshkent xalqaro aeroportidan Nyu-Yorkka to‘g‘ridan to‘g‘ri parvozni boshladi. Bu haqda Milliya aviakompaniya axborot xizmati ma’lum qildi.
“Bu birinchi to‘xtovsiz reys mamlakat fuqarolik aviatsiyasi hayotida tarixiy hodisa va O‘zbekiston milliy aviatashuvchisi rivojining yangi bosqichi hisoblanadi”, — deyiladi kompaniya xabarida.
Nyu-Yorkka to‘g‘ridan to‘g‘ri reys 13 soat davom etadi. Parvozni “O‘zbekiston havo yo‘llari” MAK ekipaji amalga oshirmoqda. Ekipaj tarkibida parvoz kompleksi direktori o‘rinbosari Sergey Kim, aviakompaniya bosh shturmani Stanislav Gurfinkel, Boeing 787 parvoz kompleksi komandiri Asadjon Tursunov, ikkinchi uchuvchilar Rustam Qo‘rg‘onov va Olimjon Uzoqov bor.
Milliy avikompaniyaning bortida 237 nafar yo‘lovchi bo‘lgan samolyoti Jon Kennedi nomidagi xalqaro aeroportga mahalliy vaqt bilan 21:30 da qo‘nadi.
“Orzular layneri”ni Nyu-Yorkdan Toshkentga havo kemasi komandiri Pavel Morgachev, Boeing 787 parvoz otryadining uchuvchi-instruktori Aleksey Markin va ikkinchi uchuvchi Ulug‘bek Ishmuhamedov boshqarib keladi.
Shu munosabat bilan Toshkent—Nyu-York—Toshkent yo‘nalishi bo‘yicha birinchi to‘xtovsiz parvozni amalga oshirgan Milliy aviakompaniya Dreamliner’ini tantanali kutib olish marosimi bo‘lib o‘tadi.
Izoh (0)