2026 йилги Жаҳон чемпионатини қайси телеканал трансляция қилиши маълум бўлди

Ўзбекистон миллий терма жамоаси ўз тарихида илк бор футбол бўйича Жаҳон чемпионатига йўлланма олди. 2026 йилги мундиал АҚШ, Мексика ва Канада майдонларида бўлиб ўтади. Спорт шарҳловчиси Даврон Файзиевнинг маълум қилишича, Жаҳон чемпионатининг Ўзбекистондаги трансляция ҳуқуқини “Zo‘r TV” телеканали қўлга киритган. Унинг сўзларига кўра, музокаралар муваффақиятли якунланган ва канал 2026 йилги мундиални тўлиқ трансляция қилади.

Бундан ташқари, “Zo‘r TV” Қатарда бўлиб ўтадиган 17 ёшгача бўлган футболчилар ўртасидаги Жаҳон чемпионатини ҳам намойиш этади.

“Дарё” нашрига яқин манбанинг маълум қилишича, “Zo‘r TV” телеканали таркибида футболга ихтисослашган янги “Zo‘r Futbol” телеканали ташкил этилиши режалаштирилган. Дастлабки маълумотларга кўра, янги канал 2026 йил январь ойида эфирга узатилиши кутилмоқда.

Эслатиб ўтамиз, аввалроқ “Setanta Sports” телеканали Англия Премьер Лигаси учрашувларининг Ўзбекистондаги трансляция ҳуқуқини 2030 йилгача сотиб олгани ҳақида хабар берилган эди.

Маълумот учун, 2026 йилги Жаҳон чемпионати 11 июндан 19 июлгача давом этади. Мусобақа АҚШ, Мексика ва Канададаги 16 та стадионда ўтказилади.