Ўрта Чирчиқда мижозларнинг пластик карточкаларидаги пулни ечиб олган банк ходими аниқланди

Ўрта Чирчиқ туманида жорий йилнинг 1 июлидан 5 июлигача бўлган вақт оралиғида «Агробанк» АTBнинг туман филиалининг норасмий ходими мижозларнинг пластик карточкаларидан 12 миллион сўмдан ортиқ маблағни банк дастури ёрдамида ўз ҳисобига ўтказиб олган. Бу ҳақда Тошкент вилояти ИИБ маълум қилди.

Банкнинг норасмий ходими 1997 йилда туғилган Р.К. банк мижозларининг пластик карточкаларини компьютер дастури ёрдамида ўзининг телефон рақамига улаган.

Шу тариқа Р.К. Ўрта Чирчиқ туманида яшовчи Р Б.нинг пластик карточкасидаги 7 300 000 сўм, А.Б.нинг 1 000 000 сўм, У.Р.нинг 1 500 000 сўм, Ш.Б.нинг 2 200 000 сўм, Х.Й.нинг 371 200 сўм пул маблағини ўз таниши А.Т.нинг номида бўлган пластик карточкага ўтказиб, ўз эҳтиёжларига ишлатиб юборган.

Ҳолат юзасидан Ўзбекистон Республикаси Жиноят Кодексининг тегишли моддалари билан жиноят иши қўзғатилди.