Мирзо Улуғбек номидаги Ўзбекистон Миллий университетида ижодий имтиҳонлар ўтказилган аудиторияларга кузатув камералари ўрнатилди. Бу ҳақда университет вакиллари «Дарё» интернет-нашрига маълум қилди.
Хабар беришларича, университетнинг Журналистика, Ижтимоий фанлар факультетларида, шунингедк, Иқтисодиёт факультетининг пенсия иши йўналишида ижодий имтиҳонлар ўтказилган.
Имтиҳонларни ошкора ва адолат мезонлари асосида ташкил этиш мақсадида имтиҳон бўлаётган барча аудиторияларга кузатув камералари ўрнатилган.
«Бу эса ота-оналар фарзандларини монитор орқали бемалол кузатиб туришларини таъминлади», — дейилади университет ахборотида.
Университет вакилларининг «Дарё»га маълум қилишларича, 1 август куни бўладиган тест синовлари вақтида ҳам барча имтиҳон аудиторияларига кузатув камералари ўрнатилади.
Аввалроқ университетда татбиқ этилган «ақлли технологиялар» воситасида бошқа абитуриентнинг ўрнига ҳужжат топширишга уринган «зиёли снайперлар» фош этилгани ҳақида хабарлар берилган эди.
Изоҳ (0)