Тошкент давлат юридик университети (ТДЮУ)да бўлиб ўтадиган 2017 йилги кириш имтиҳонларида адолатни таъминлаш мақсадида бир қатор янгиликлар амалга оширилади. Бу ҳақида университет қабул комиссияси «Дарё»га маълум қилди.
Жумладан, тест синовлари ўтказиладиган бинога киришда абитуриент микрокалкулятор, луғат, жадвал, китоб, уяли телефон, компьютер, телекоммуникация воситалари ва шпаргалкалар олиб киришга ҳаракат қилгани назоратчилар томонидан аниқланса, абитуриентга далолатнома тузилиб, у тест жараёнидан четлаштирилади.
Аслида ушбу қоида янгилик эмас. Вазирлар Маҳкамасининг 20 июндаги қарори билан тасдиқланган «Олий таълим муассасаларининг бакалавриатига талабаларни ўқишга қабул қилиш тартиби тўғрисидаги низом»да ҳам, ундан олдин амалда бўлган низомларда ҳам мазкур қоида белгилаб қўйилган эди.
«Бироқ ушбу қоидага доим ҳам қатъий амал қилинмас, абитуриентларнинг мазкур ножўя хатти-ҳаракати аксарият ҳолларда кечириларди», — дейди университет қабул комиссияси вакили.
2017 йилдан бошлаб эса мазкур қоидага қатъий амал қилинади. Тест синовлари ўтказиладиган бинога қўшимча воситаларни олиб киришга уринган абитуриент аниқлангани заҳоти имтиҳонларга кирмасидан четлатилади.
Қабул комиссияси берган маълумотларга кўра, барча абитуриентлар номига махсус огоҳлантириш хатлари тайёрланган ва ДТМ варақасини олишга келган ҳар бир абитуриент яна бир бор бу ҳақида огоҳлантирилади.
Маълумот учун, бу йил ТДЮУ жами 600 нафар талаба қабул қилади. 15 июндан 15 июлга қадар давом этган қабул жараёнида ўзбек гуруҳига 5 178 нафар, рус гуруҳига эса 954 нафар абитуриент ҳужжат топширган.
Ўтган йилги билан таққослаганда, университетда ўқиш учун ҳужжат топширган абитуриентлар сони 1 736 нафарга (39,5 фоизга) ошган.
Изоҳ (0)