«Яллама» божхона постида каноп толаси ўрнига 6,4 млрд сўмлик маҳсулот ортган машиналар тўхтатилди

Тошкент вилояти божхона бошқармаси «Яллама» чегара божхона пости ходимлари томонидан пойтахтда фаолият юритувчи STAP VALLEY AGENT корхонаси номига келтирилаётган юклар ортилган 2 та юк машинаси божхона назоратидан ўтказилганда, йирик миқдордаги қоидабузарликлар фош этилди. Бу ҳақда «Дарё»га бошқарма ахборот хизмати маълум қилди.

Қўшни давлат фуқаролари Я.Исламов ва П.Саидовлар бошқарувидаги ушбу автомашиналарда аслида йўл-юк кузатув ҳужжатларига кўра салкам 57 тонна каноп толаси келтирилаётган бўлиши лозим эди. Аммо божхона кўриги давомида автомашиналар юкхонасида ушбу турдаги товарлар умуман йўқлиги аниқланди.

Хусусан, автомашиналардан бирида каноп толаси ўрнига ҳужжатларда кўрсатилмаган, божхона назоратидан яширилган, хорижий давлатларда ишлаб чиқарилган 99 турдаги, хусусан кийим-кечаклар, оёқ кийимлари, сувенирлар ва бошқа турдаги маҳсулотлар борлиги аниқланди.

Дастлабки ҳисоб-китобларга кўра, ноқонуний равишда олиб киришга уринилган мазкур товар-моддий бойликларнинг тахминий нархи салкам 3,3 миллиард сўмни ташкил қилади.

Иккинчи автомашинада ҳам худди шундай ҳолат, яъни қонунбузарлар божхона назоратидан яширганча 49 турдаги маҳсулот: оёқ кийимлар, ширинликлар, ичимликлар, кийим-кечаклар, газламалар, маиший техника буюмлари ва бошқа турдаги товарларни олиб киришга уринган пайтда тўхтатиб қолинди.

Дастлабки ҳисоб-китобларга кўра, иккинчи автомашинадаги ноқонуний равишда олиб киришга уринилган товар-моддий бойликларнинг тахминий нархи салкам 3,1 миллиард сўмни ташкил қилади.

Шунингдек, вилоят божхоначилари республикадан транзит тарзида ўтаётган, Хитойдан Тожикистонга қараб йўл олган юк мавтомашинасини божхона назоратидан ўтказиш вақтида яна бир божхона қоидабузарлигини фош қилди.

Йўл-юк кузатув ҳужжатларига кўра, қўшни давлат фуқароси А.Валиев бошқарувидаги ушбу автомашинага 7 турдаги салкам 29 тонна хўжалик моли ортилган бўлиши лозим эди. Автомобиль юкхонаси эшигидаги пломбаларнинг ўзгартирилганлиги божхоначиларни янада шубҳалантирди. Шундан сўнг, автотранспорт воситаси белгиланган тартибда ва холислар иштирокида кўздан кечирилди. Машинага хўжалик моллари ўрнига қурилишда қўлланиладиган салкам 1300 дона гипсокартон ортилганлиги маълум бўлди.

Ҳозирда мазкур ҳолатлар юзасидан божхона текширувлари ва суриштирув ҳаракатлари давом эттирилмоқда.