Xalqaro press-klubning 26-iyulda bo‘lib o‘tgan sessiyasida ishtirok etgan Markaziy bank raisi o‘rinbosari Saidkamol Xo‘jayev yaqin vaqt ichida jismoniy shaxslarga bozor kursida valyuta sotib olish va sotish, o‘zbek so‘mini bankomatlarda xohlagancha naqdlashtirish imkoniyati berilishini aytib o‘tdi.
Jurnalistlar tomonidan valyutaning erkin konvertatsiyasi va plastik kartalardagi pul mablag‘larini naqdlashtirish uchun o‘rnatiladigan bankomatlar yuzasidan berilgan savolga javob bergan Markaziy bank vakili bu borada bir qator ishlar olib borilayotganini va yangiliklar bo‘lishini ta’kidladi.
Shu bilan birga, Saidkamol Xo‘jayev ayni paytda jismoniy shaxslarga xalqaro plastik kartalarda xorijiy valyuta sotilayotganini va bu valyutadan faqat xorijiy mamlakatlarda foydalanish mumkinligini qo‘shimcha qildi.
Bankomatlar masalasiga to‘xtalgan Markaziy bank raisi o‘rinbosari o‘n ming so‘mlik kupyuralarning chiqarilishi bankomatlar o‘rnatilishi yo‘lida qo‘yilgan birinchi qadam ekanligini qayd etdi.
Ta’kidlanishicha, bankomatlar ishlashi uchun kupyuralarni bankomatga joylashtirish, ulardan necha kishi pullarni naqdlashtirishi mumkinligi kabi bir qator masalalar hal qilinishi kerak.
Albatta, plastik kartada bo‘lgan milliy valyutadagi mablag‘larni naqdlashtirish amalda bo‘lishi kerak bo‘lgan narsa. Biroq buni bosqichma-bosqich amalga oshirishga majburmiz. Hozirgi kunda pul-kredit siyosatida amalga oshirilayotgan ishlar o‘zining ma’lum natijasini bergach, o‘zbek so‘mini bankomatlarda xohlagan vaqtda xohlagancha naqdlashtirish imkoniyati bo‘ladi. Tez orada bu imkoniyatlar paydo bo‘ladi.Saidkamol Xo‘jayev, O‘zbekiston Markaziy banki raisi o‘rinbosari
Izoh (0)