Эрон ҳукумати амалдаги пул бирлиги — риалдан янги — туман пул бирлигига ўтишга рухсат берди. Бу ҳақда IRNA агентлиги мамлакат вазирлар маҳкамасининг котибига асосланиб маълум қилди, деб хабар берди «ТАСС».
«Жорий қарор нақд тўловларни соддалаштиришга қаратилган. Бир туман 10 риалга тенг бўлади, шундай экан нархларни акс эттирувчи рақамлар битта нолга камаяди», — деди Муҳсин Ҳожи Мирзайи.
Унинг сўзларига кўра, янги пул бирлигига ўтиш ҳукуматнинг иқтисодий комиссияси томонидан сўнгги ярим йил давомида кўриб чиқилган. Туман Форсияда (Эроннинг аввалги номи) 1932 йилга қадар амалда бўлган ва риалга алмаштирилган.
Бунга қадар туман Эронда норасмий пул бирлиги ҳисобланган. Марказий банкнинг банкноталарида ва дўконлардаги нархларда риал амалда бўлган, бироқ эронликлар ҳар кунлик мулоқотларида «туман» сўзидан фойдаланган, бу эса чалкашликларни келтириб чиқарган.
Сўнгги йилдаги инфляция сабаб риалнинг қадри сезиларли даражада пасайди. Айни вақтда бир АҚШ доллари 39 минг риалга тенг, эндиликда у 3,9 минг туманга тенг бўлади.
Изоҳ (0)