Президент девони Фуқаролар ҳуқуқларини ҳимоя қилиш, жисмоний ва юридик шахсларнинг мурожаатлари билан ишлашни назорат қилиш ва мувофиқлаштириш хизмати ходимлари томонидан 22 июль, шанба куни Олмалиқ шаҳрида назорат ташрифлари амалга оширилди. Бу ҳақда Facebook’даги «Халқ билан мулоқот» гуруҳи хабар берди.
Ташриф давомида жорий йил 17 апрель куни Олмалиқда ўтказилган сайёр қабулдаги қарорлар, 118 нафар фуқаронинг Ўзбекистон Президентининг виртуал ва Халқ қабулхоналарига мурожаатларининг амалда бажарилиши ўрганилди.
Девон ходимлари мурожаат қилган фуқароларнинг уйларида бўлиб, улар билан суҳбатлашди ва мурожаатларининг ижроси юзасидан бевосита маълумотга эга бўлди.
Ўзбекистон Президенти номидан икки етим қизга икки хонали квартира ажратилди ва 5 миллион сўм берилди. Шунингдек, аҳолининг кам таъминланган қатламига кўмак учун ажратилган маблағлар ҳисобидан айрим фуқароларга даволаниши ва қайта тикланиши учун моддий ёрдам кўрсатилди.
Изоҳ (0)