Дилноза Кубаева: «Болалигим оддий ўтмаган»

Дилноза Кубаева «Darakchi.uz» нашрига берган интервьюсида болалиги оддий ўтмаганини маълум қилди.

«Ролларимнинг барини ўзимдан оламан. Болалигим ҳам оддий ўтмаган. Анча-мунча кинога татийдиган лаҳзалар ҳам бор-да. «Келгинди келин» эсланг, «Алло, дадажон...» деб бошланувчи лавҳа бор-ку, ана шу ўзимники. Тарбиялаган ролларим эса асосан театрда. «Андишали келинчак»даги Олмахон мисол учун, ҳамиша қўли кўксида, кулиб туради, «Хўп бўлади», дейди доим. Эгилганингиз сари юзага чиқасиз, Олмахондан шуларни ўрганаман. «Қуёшни сен уйғотасан», «Огоҳ бўлинг, одамлар»даги ролларим эса шукр қилишга ундайди», — деди актриса.

«Болалигим оддий ўтмаган деганда, нимани назарда тутдингиз?» — дея савол берди журналист.«Ҳар бир оиланинг ўзига яраша паст-баландликлари, яхши-ёмон кунлари бўлади. Бу ҳақда гапиришни хоҳламасдим... Кичиклигимдан бошқаларга қўшилолмасдим, бир чеккада қимтинибгина турадиган қизалоқ бўлганман. Мактабга ҳам боришни истамасдим. Ҳар бир воқеа-ҳодисани ўйлайверардим, «Нега бу шундай?» деб. Тан оламан, қийинчиликда ўсганмиз. Лекин ҳаммаси учун шукр қиламан. Чунки мана шуларнинг барчаси бугун ролларимда ифодасини топаяпти. Агар қийинчилик кўрмай улғайганимда балким бугунги даражага эриша олмаган бўлармидим?», — деди Кубаева.