Дилноза Кубаева: «Ўзбек киноси жуда қалтис вазиятга тушиб қоляпти»

Актриса Дилноза Кубаева «Сўғдиёна» нашрига берган интервьюсида ўзбек киноси жуда қалтис вазиятга тушиб қолаётганини айтди, деб хабар бермоқда «Darakchi.uz».

«Ўзбек киноси жуда қалтис вазиятга тушиб қоляпти. Бунга аввало биз — ижодкорлар айбдормиз. Томошабинларнинг ҳам таъсири йўқ деёлмайман. Драматургияни тушунган-тушунмаган одам ҳам бизга тош отишни касб қилиб олди. Хоҳлаган киши кинони танқид қила оладиган бўлди. Лекин бу адолатданми? Нега актёр-актрисалар шифокорлар, ўқитувчи-ю бошқа соҳа вакилларининг ишига аралашмаймиз-у, бизни сиқувга олаверишади? Гапиришсин, агар шунга асослари бўлса! Бутун бошли кўрсатувлар бугун яратилаётган фильмларни қоралашга бағишланаяпти. Айрим мухлисларимиз театрга келиб, «Нега бу ҳолатга индамаяпсизлар? Меҳнатингиз-ку ахир», деб гапиришди ҳам. Ҳозир сизга сўзлаб бераяпман, аммо юрагимдаги оғриқ ўзимга аён... Биз бирор соҳа вакилини гапирсак, фақат камчилигини айтмай, ютуқларини ҳам тилга оламиз-ку. Нега ижодкорларга келганда фақат хатосини излашади? Мақташга арзигулик фильмлар йўқ дейсизми? Сўнгги пайтларда ўзбек киносида қандай ўзгаришлар бўлаяпти, билишмайди, лекин мавзу керак бўлса, кинога ёпишишади. Ахир бу ноҳақлик-ку!» — деди актриса.

Журналистнинг «ноўрин танқид бўлаётган экан, нега индамаяпсизлар?» — деган саволига жавобан, Дилноза Кубаева: «Бу биргина менга боғлиқ эмас. Кинога бағишланган кўрсатувлардан бирида фикримни айтдим. Гап эгасини топди. Лекин ўша одам вазият янада қалтис тус олишига сабаб бўлди. Эҳтимол, барча ижодкорлар бирлашсак, ноўрин танқидларга чап бера олармиз», — деди.

Дилдора Юсуфбекова суҳбатлашди.