Ўзбекистон миллий терма жамоаси сардори Одил Аҳмедов Наманганда футбол академиясига асос солиш ишларини бошлагани ҳақида хабар берилганди. Айни пайтда водий болалар ўртасидаги Чемпионлар лигаси мусобақасини ўтказиш тараддудида.
Мусобақанинг асосий ташкилотчиси ҳисобланган Одил Аҳмедов «Championat.asia» нашрига интервью бериб, бу борада кўнгли тўлмаётган жиҳатларни очиқ-ойдин баён қилди.
«Наманганда ёшлар футболи қайта оёққа тураётганини эшитган водийликлардан жуда кўп мактублар оляпман», — деб гап бошлади фаолиятини «Шанхай СИПГ» сафида давом эттираётган футболчи.
«Навбаҳор»нинг янги президенти Шавкат Абдураззоқов клуб ўринбосарлари учун алоҳида шароит яратиб берганини эшитдим ва хурсанд бўлдим. Чунки бу ишимизни енгиллаштиради. Биз коллеждан яхши болаларни етиштириб берамиз. Кейин улар ўринбосарлар таркиби орқали асосий жамоага жойлашиши учун кўмаклашамиз ёки четга чиқиш билан шуғулланамиз. Шу томондан олиб қаралса, ўринбосарларга бўлган эътибор жуда муҳим.Агар жамоа ўз ўринбосарларига жиддий эътибор қаратмаса, четдан келган футболчилар ҳозир клубни эмас, ўзини ўйлайдиган бўлиб қолди. Тез кунларда хориждаги ҳамкорларимиз билан мураббийлар малакасини ошириш борасида иш бошлаймиз.
Одил Аҳмедов, «Шанхай СИПГ» аъзоси
«Навбаҳор» ўтган мавсум охирини анча бўш ўтказиб, Биринчи лига ёқасига келиб қолганди. Кейинроқ клубга Одил Аҳмедов ёрдам бераётгани борасида гап-сўзлар пайдо бўлди. Илҳом Мўминжоновнинг Наманган жамоасига ташрифидан кейин «Навбаҳор» бир амаллаб Олий лигадаги ўрнини сақлаб қолди.
Шунга қарамай, клуб ишлари кейинчалик барибир ўнгланмаган. Аҳмедов шу хусусда ҳам тўхталиб ўтди.
Ўтган йил жамоа қийин аҳволга тушиб қолди. Ўшанда қўлимдан келганича ёрдам бердим. Бу йил ҳам шундай ниятим бор эди. Аммо клуб Олий лигада қолгач, мен керак бўлмай қолдим. Майли, бунга қаршилигим йўқ. Лекин амалда нима ўзгарди?Мўминжонов менга ёшларга эътибор қаратишга ваъда берганди. Бироқ якунда рулни ўз қўлига ола бошлади, худдики, барча ишни у қилди. Бемалол ишлайверсин. Лекин Наманганни карвонсарой қилишмасин.
Виктор Жалиловни кўпчилик ёмон кўради. Лекин у ҳар доим 2—3 футболчини кашф қилиб кетган. Бизга мана шундай мураббийлар керак. Мўминжонов клубда яна қанча ишлайди билмайман. Биз эса ишни кечиктирмай, ёшларга урғу беришимиз керак, бошқа гап-сўз бўлиши мумкин эмас.
Одил Аҳмедов, «Шанхай СИПГ» аъзоси
Одил Аҳмедов ёшларга бўлган эътиборни хориждан ташриф буюрган футболчиларга бўлган эътибор билан солиштириб беришга ҳаракат қилган. Бунда у аниқ номлардан фойдаланган.
Мана «Неймар»ни олайлик (Аҳмад Мамадалиев. 1997 йил туғилган). У нонвой, кечалари нон ёпиб чиқади, кейин машғулотга келади. Агар оилавий ҳолати шундай бўлса, бола қандай қилиб ўсади?Йованович нега йўқолиб қолди? Ёки «Навбаҳор» унга машғулот майдоними, йил бошида ўйнай олмай, охирида гол урадиган! Яна урган голлари ҳам ғалаба келтирмаган. Бундай дурангларни маҳаллий футболчилар билан ҳам қўлга кирица бўлади. Ёш ўйинчига 10 марта имконият беринг, у ҳам 11-турдан кейин уришни бошлайди. Гапирса гап кўп...
Азизбек Турғунбоев-чи? У ўтган йил оилавий аҳволидан келиб чиқиб, Россияга кетишга тайёр турганди. Чунки 2016 йил эътиборсиз қолди. Бу йил ҳам клубдан кетказишаётганди. Чунки фамилияси йўқ-да! Нимадир бўлди-ю, битта ўйиндан кейин қолди. Мана ҳозир асосий таркиб футболчиси. Наманганлик талантлар Россияга ишлагани эмас, ўйнагани кетиши керак! Мана шу фалсафани илгари суришни истардим.
Одил Аҳмедов, «Шанхай СИПГ» аъзоси
Наманганда футбол академияси вужудга келаётган бўлса-да, бу йўлда қаршиликлар ҳам бўлиб тургани айтилди. Одил Аҳмедов барчасини ўз маблағи ҳисобидан қилаётган бўлса-да, иш олға силжишини секинлаштираётган факторлар бор.
Муаммо шундаки, шунча иш қилинса-да, тўсиқлар бўлиб турибди. Агар Намангандаги коллеж ва лицейни қайта оёққа турғизмасак, ўринбосарлар сафига бола қаердан келади? Ўринбосарларда футболчи бўлмаса, асосий таркибга ким келади?Яқин кунларда Наманганда иккита катта сунъий майдон қурилиши бошланади. Уни кўчадан келганлардан пул ишлаш учун қилмаяпман, ёшлар учун жой бўлсин дейман. Шуни ҳам гапириб юрганлар, иш бошлашимиз учун қаршилик қилаётганлар учраб турибди.
Водий Чемпионлар лигаси ғояси ҳам ўз-ўзидан келмади. Коллеж ва лицейга яхши футболчиларни саралаб олайлик деяпмиз. Рауф Инилеев ҳам текинга ишламайди, унга ҳам маошни ўзимиз берамиз. Мутахассисларни Италияга, «Краснодар» академиясига юборишни режа қилиб турибман. Коллеж ва лицейдаги барча мураббийларни қайта кўриб чиқиб, маъқулини олиб қолиш, уларни замонавий фикрлашга ўргатишимиз керак. Рауф Инилеев шу ишларга масъул бўлади ва биз истаётган методиканинг қандай ишлаётганини назорат қилади. Инвентарлар яхши бўлсин, болакайларнинг тўп билан муаммоси бўлмасин. Хуллас, ҳаммасини аъло қилишни ўйлаб қўйганмиз. Бироқ қаршиликлар давом этаверса, мен қандай ишлайман? Лойиҳани Тошкентга кўчираманми ёки Фарғонага? Менга қаршилик қилишмаса бўлди, ахир бировдан пул сўраётганим йўқ-ку!
Одил Аҳмедов, «Шанхай СИПГ» аъзоси
Изоҳ (0)