O‘zbekiston milliy terma jamoasi sardori Odil Ahmedov Namanganda futbol akademiyasiga asos solish ishlarini boshlagani haqida xabar berilgandi. Ayni paytda vodiy bolalar o‘rtasidagi Chempionlar ligasi musobaqasini o‘tkazish taraddudida.
Musobaqaning asosiy tashkilotchisi hisoblangan Odil Ahmedov “Championat.asia” nashriga intervyu berib, bu borada ko‘ngli to‘lmayotgan jihatlarni ochiq-oydin bayon qildi.
“Namanganda yoshlar futboli qayta oyoqqa turayotganini eshitgan vodiyliklardan juda ko‘p maktublar olyapman”, — deb gap boshladi faoliyatini “Shanxay SIPG” safida davom ettirayotgan futbolchi.
“Navbahor”ning yangi prezidenti Shavkat Abdurazzoqov klub o‘rinbosarlari uchun alohida sharoit yaratib berganini eshitdim va xursand bo‘ldim. Chunki bu ishimizni yengillashtiradi. Biz kollejdan yaxshi bolalarni yetishtirib beramiz. Keyin ular o‘rinbosarlar tarkibi orqali asosiy jamoaga joylashishi uchun ko‘maklashamiz yoki chetga chiqish bilan shug‘ullanamiz. Shu tomondan olib qaralsa, o‘rinbosarlarga bo‘lgan e’tibor juda muhim.Agar jamoa o‘z o‘rinbosarlariga jiddiy e’tibor qaratmasa, chetdan kelgan futbolchilar hozir klubni emas, o‘zini o‘ylaydigan bo‘lib qoldi. Tez kunlarda xorijdagi hamkorlarimiz bilan murabbiylar malakasini oshirish borasida ish boshlaymiz.
Odil Ahmedov, “Shanxay SIPG” a’zosi
Shunga qaramay, klub ishlari keyinchalik baribir o‘nglanmagan. Ahmedov shu xususda ham to‘xtalib o‘tdi.
O‘tgan yil jamoa qiyin ahvolga tushib qoldi. O‘shanda qo‘limdan kelganicha yordam berdim. Bu yil ham shunday niyatim bor edi. Ammo klub Oliy ligada qolgach, men kerak bo‘lmay qoldim. Mayli, bunga qarshiligim yo‘q. Lekin amalda nima o‘zgardi?Mo‘minjonov menga yoshlarga e’tibor qaratishga va’da bergandi. Biroq yakunda rulni o‘z qo‘liga ola boshladi, xuddiki, barcha ishni u qildi. Bemalol ishlayversin. Lekin Namanganni karvonsaroy qilishmasin.
Viktor Jalilovni ko‘pchilik yomon ko‘radi. Lekin u har doim 2—3 futbolchini kashf qilib ketgan. Bizga mana shunday murabbiylar kerak. Mo‘minjonov klubda yana qancha ishlaydi bilmayman. Biz esa ishni kechiktirmay, yoshlarga urg‘u berishimiz kerak, boshqa gap-so‘z bo‘lishi mumkin emas.
Odil Ahmedov, “Shanxay SIPG” a’zosi
Odil Ahmedov yoshlarga bo‘lgan e’tiborni xorijdan tashrif buyurgan futbolchilarga bo‘lgan e’tibor bilan solishtirib berishga harakat qilgan. Bunda u aniq nomlardan foydalangan.
Mana “Neymar”ni olaylik (Ahmad Mamadaliyev. 1997-yil tug‘ilgan). U nonvoy, kechalari non yopib chiqadi, keyin mashg‘ulotga keladi. Agar oilaviy holati shunday bo‘lsa, bola qanday qilib o‘sadi?Yovanovich nega yo‘qolib qoldi? Yoki “Navbahor” unga mashg‘ulot maydonimi, yil boshida o‘ynay olmay, oxirida gol uradigan! Yana urgan gollari ham g‘alaba keltirmagan. Bunday duranglarni mahalliy futbolchilar bilan ham qo‘lga kiritsa bo‘ladi. Yosh o‘yinchiga 10 marta imkoniyat bering, u ham 11-turdan keyin urishni boshlaydi. Gapirsa gap ko‘p...
Azizbek Turg‘unboyev-chi? U o‘tgan yil oilaviy ahvolidan kelib chiqib, Rossiyaga ketishga tayyor turgandi. Chunki 2016-yil e’tiborsiz qoldi. Bu yil ham klubdan ketkazishayotgandi. Chunki familiyasi yo‘q-da! Nimadir bo‘ldi-yu, bitta o‘yindan keyin qoldi. Mana hozir asosiy tarkib futbolchisi. Namanganlik talantlar Rossiyaga ishlagani emas, o‘ynagani ketishi kerak! Mana shu falsafani ilgari surishni istardim.
Odil Ahmedov, “Shanxay SIPG” a’zosi
Namanganda futbol akademiyasi vujudga kelayotgan bo‘lsa-da, bu yo‘lda qarshiliklar ham bo‘lib turgani aytildi. Odil Ahmedov barchasini o‘z mablag‘i hisobidan qilayotgan bo‘lsa-da, ish olg‘a siljishini sekinlashtirayotgan faktorlar bor.
Muammo shundaki, shuncha ish qilinsa-da, to‘siqlar bo‘lib turibdi. Agar Namangandagi kollej va litseyni qayta oyoqqa turg‘izmasak, o‘rinbosarlar safiga bola qayerdan keladi? O‘rinbosarlarda futbolchi bo‘lmasa, asosiy tarkibga kim keladi?Yaqin kunlarda Namanganda ikkita katta sun’iy maydon qurilishi boshlanadi. Uni ko‘chadan kelganlardan pul ishlash uchun qilmayapman, yoshlar uchun joy bo‘lsin deyman. Shuni ham gapirib yurganlar, ish boshlashimiz uchun qarshilik qilayotganlar uchrab turibdi.
Vodiy Chempionlar ligasi g‘oyasi ham o‘z-o‘zidan kelmadi. Kollej va litseyga yaxshi futbolchilarni saralab olaylik deyapmiz. Rauf Inileyev ham tekinga ishlamaydi, unga ham maoshni o‘zimiz beramiz. Mutaxassislarni Italiyaga, “Krasnodar” akademiyasiga yuborishni reja qilib turibman. Kollej va litseydagi barcha murabbiylarni qayta ko‘rib chiqib, ma’qulini olib qolish, ularni zamonaviy fikrlashga o‘rgatishimiz kerak. Rauf Inileyev shu ishlarga mas’ul bo‘ladi va biz istayotgan metodikaning qanday ishlayotganini nazorat qiladi. Inventarlar yaxshi bo‘lsin, bolakaylarning to‘p bilan muammosi bo‘lmasin. Xullas, hammasini a’lo qilishni o‘ylab qo‘yganmiz. Biroq qarshiliklar davom etaversa, men qanday ishlayman? Loyihani Toshkentga ko‘chiramanmi yoki Farg‘onaga? Menga qarshilik qilishmasa bo‘ldi, axir birovdan pul so‘rayotganim yo‘q-ku!
Odil Ahmedov, “Shanxay SIPG” a’zosi
Izoh (0)