Ўзбекистон Президенти Шавкат Мирзиёев ўз фармони билан 4 июль куни 70 ёшга тўлган Мираброр Усмоновни «Дўстлик» ордени билан тақдирлади. Бу ҳақда «Газета.uz» хабар бермоқда.
Мираброр Усмонов — таниқли давлат ва спорт арбоби. 1990—1992 йилларда Ўзбекистон савдо вазири, 1992—1994 йилларда «Ўзбексавдо» компанияси раиси, 1994—2005 йилларда бош вазир ўринбосари лавозимларида меҳнат қилган.
2006 йилдан Ўзбекистон футбол федерацияси президенти. 2013—2016 йилларда, бир вақтнинг ўзида, Ўзбекистон Миллий олимпия қўмитаси (МОҚ)га ҳам раҳбарлик қилган.
2005 йилдан сенатор, ҳозирда Сенатнинг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси раисининг ўринбосари.
Президент фармонида таъкидланишича, Мираброр Усмонов давлат бошқаруви органлари ва жамоат ташкилотларидаги кўп йиллик самарали ва фидокорона меҳнати, Ўзбекистоннинг халқаро майдондаги обрў-эътиборини юксалтириш, ёш авлодни жисмоний ва маънавий етук инсонлар этиб тарбиялаш ишига қўшган катта ҳиссаси учун юксак унвон билан тақдирланди.
МОҚ сайтида эълон қилинган табрикномада Ўзбекистон олимпия делегацияси Мираброр Усмонов раҳбарлигида энг яхши натижага эришгани алоҳида қайд этилган. 2016 йили Бразилияда бўлиб ўтган ёзги Олимпия ўйинларида Ўзбекистон термаси 13 медални қўлга киритиб, умумжамоа ҳисобида 21-ўринни эгаллади.
Мираброр Усмонов бунгача «Меҳнат шуҳрати» (1995 йил), «Фидокорона хизматлари учун» (2007) ва «Эл-юрт хизмати» (2011) орденлари билан тақдирланган. Бундан ташқари, у Осиё Олимпия кенгашининг «Олтин ордени» ва ФИФАнинг «Хизматлари учун» ордени билан мукофотланган.
Изоҳ (0)