Япония Сеул ва Пхеньян ўртасидаги музокаралар Шимолий Кореяга босим сиёсатига таъсир этмаслигини билдирди
Япония ҳукумати Жанубий Кореянинг икки давлат мудофаа вазирликлари вакиллари иштирокида КХДР билан музокаралар ўтказиш таклифини қўллаб-қувватлайди. Бу ҳақда Токиодаги матбуот анжуманида мамлакат вазирлар маҳкамаси бош котиби Ёсихидэ Суга маълум қилди, дея хабар беради «ТАСС».
«Япония, АҚШ ва Жанубий Кореянинг Пхеньянга босим ўтказишни кучайтириш бўйича келишуви нуқтаи назаридан ҳам бу борада ҳеч қандай муаммо кўрмаяпмиз. Биз бундан кейин ҳам биргаликда Шимолий Кореяга нисбатан мулоқот, босим ва ҳаракат сиёсатини юритишда давом этиш ниятидамиз», — деди Ёсихидэ Суга.
Жанубий Корея 17 июль, душанба куни КХДРга 21 июль куни Пханмунджом чегара пунктида мудофаа вазирликлари вакиллари иштирокида, 1 августда эса Қизил Хоч йўналиши бўйича музокаралар ўтказишни таклиф этди.
