Америка ҳарбий-денгиз флоти Форс кўрфазида лазерли қуролни синовдан ўтказди. Бу ҳақда CNN телекомпанияси хабар берди, деб ёзади «Газета.ru».
Янги турдаги қурол — LaWS ёки Laser Weapons System USS Ponce амфибия кемаси бортида капитан Кристофер Уэллс қўмондонлиги остида синалди. Унинг сўзларига кўра, лазерли қурол «ўқдан кўра аниқроқ» ишлайди. Командир уни «кўплаб нишонларга қарши қўллаш мумкин бўлган универсал қурол» деб атади.
Синов учун учувчисиз учар қурилмадан фойдаланилди. Дроннинг лазер нури туширилган қаноти зудлик билан чақнаб кетиб, минг даража ҳароратгача қизиди ва қурилма вайрон бўлиб, сўнг денгизга қулади.
Шу билан бирга, ҳужумнинг ўзини оддий кўз билан кўриб бўлмайди. Офицер Кейл Хюз аниқлик киритишича, нур спектрнинг кўринмас қисмида ишлайди.
Тизим нархи 40 миллион долларга баҳоланмоқда, бир марта ўқ отиш эса бир долларга тушади. Электр токини ўзининг кичик генератори ишлаб чиқаради, қурилмага уч кишилик жанговар гуруҳ хизмат кўрсатади.
Изоҳ (0)