Россиянинг Биринчи каналидаги «Мода суди ҳукми» («Модний приговор») дастури бош стилисти Алексей Сухарёв ёзги таътил вақтида амалга ошириладиган саёҳатлар чоғида қандай кийимлар кийиш борасида ўз маслаҳатлари билан бўлишди.
«Денгиз услубининг асоси — бу албатта йўл-йўл кофта. Уни танлашдаги асосий қоида — оқ чизиқ кўкидан энлироқ бўлиши керак. Шунда йўл-йўл кофта қоматни тўла қилиб кўрсатмайди ва ҳар қандай комплектга мос тушади. Кийим етарлича кенг, ҳатто елкаси ва узунлиги ҳам бемалол туриши керак, шунда сиз уни ҳам шим ёки юбкага солиб, ҳам улардан чиқариб кийишингиз мумкин. Эсда тутинг, қиёфага фақат битта йўл-йўл кийимни киритиш мумкин, қолган кийимларнинг барчаси бир тусли бўлсин», — дейди стилист.
Йўл-йўл кофта жинси шимлар — ҳам классик, ҳам скинни ва бойфренд шимлар билан ярашади. Оддий матоли шим киймоқчи бўлсангиз, тўқ кўк, оқ, қизил ва оч жигарранг тусларини танланг, бели баландда, ўзи эса полгача ташланиб турадиган шимлар, шунингдек, кюлот шимлар кўринишидаги моделлар унга мос тушади. Устки кийим сифатида оддий оқ жакет ёки тилларанг тугмали блейзер ва жинси курткани ҳам танлашингиз мумкин.
Бундай йўл-йўл кўйлаклар жуда «хавфли»: улар қоматингизнинг маълум бир қисмларини семиз қилиб кўрсатиши мумкин. Агар йўл-йўл кўйлак кийишни жудаям истаётган бўлсангиз, ингичка оқ-ҳаворанг чизиқлисини танланг.
Денгиз услубидаги юбкалар тиззагача тўғри тушган, годе бичимидаги ёки «қалам» кўринишида бўлиши мумкин. Асосийси, уларнинг ранги қизил, оқ, кўк бўлсин ва денгизга ишора қилувчи ҳар қандай безаклари бор бўлсин.
Круиз туридаги аксессуарлар — кема руль чамбари, кораллар кўринишидаги зираклар, лента тақилган шляпалар, йўл-йўл матоли тасмаси бўлган соатлар, похол сумкалар (катта эмас, қутича кўринишидаги ва елкага тақиладиганлари).
Денгиз услубидаги оёқ кийимлар ҳам мавжуд, булар — эспадрилья, пўкак тагчармли босоножка, оқ кеда, топсайдерлар.
Манба: Woman’s Day
Изоҳ (0)