Ҳиндистон расмийлари Ғарбий Бенгалия штатининг иккинчи кундан бери динлараро тўқнашувлар тинмаётган ҳудудларидан бирига шошилинч равишда 400 дан ортиқ ҳарбий юборди. Бу ҳақда «ТАСС» хабар бермоқда.
NDTV телеканали тартибсизликлар ҳиндуийлар ва мусулмонлар истиқомат қиладиган Шимолий 24 Паргани ҳудудида бошланганини маълум қилди.
Можарога Facebook ижтимоий тармоғида қолдирилган маҳаллий обидалардан бири ҳақидаги (бошқа маълумотларга кўра, пайғамбар Муҳаммад с.а.в тилга олинган) ҳақоратли пост сабаб бўлгани билдирилмоқда. Уни ёзган йигит қўлга олинди.
Округда оломон йўлларни тўсиб, дўкон ва расталарга ҳужум уюштирмоқда. Мусулмон ва ҳиндуий жамоалари етакчилари бир-бирини фитна ва зўравонликларда айбламоқда.
Ҳодиса оқибатида кўплаб жабрланганлар борлиги ҳақида хабар берилмоқда, бироқ қурбонлар ҳақида расман маълум қилинмади.
Изоҳ (0)