Халқаро пресс-клуб раҳбари Шерзод Қудратхўжаев ўзининг Facebook’даги саҳифасида Қозоғистонда бўлиб ўтган Евроосиё медиафорум якунлари ва бугунги кундаги сиёсат олами етакчилари ҳақидаги ўз фикрларини билдирди.
Яқинда Қозоғистонда бўлиб ўтган Евроосиё халқаро медиафорумида иштирок этиб қайтдим. Кўп жараёнларни кўрдим, кўп нарсани ўрганишга ҳаракат қилдим. Кўп ўйлар, фикрлар келди.Дунёда кечаётган мураккаб жараёнлар хусусида катта мамлакатнинг собиқ президенти, Европа иттифоқининг биринчи рақамли амалдорлари, йирик мега корпорациялар вакиллари маърузалари кўп мавзулар учун янги илҳомлар берди.
Тушундимки, бугун давлат қанчалик катта бўлмасин тор миллий чегаралар ичига беркиниши дунёдан ортда қолиш демакдир. Бугун эса дунё ХХ асрдаги дунё эмас.
Баъзилар билан суҳбатлашганда айтишади Черчилль, Рузвелтлар ўтиб кетди, Маргарет Тетчер, Фидель Кастролар каби буюк сиёсатчилар ҳам йўқ. Оламшумул қарорлар ҳам йўқ.
Мен бу фикрга қўшилмайман. ХХ аср билан бугунги шиддатни умуман таққослаш мумкин эмас. У пайтлар олам бошқача тамойил ва қоидалар билан яшаган. Давлат раҳбари учун бир суткада 12 соат кун бўлган. Қолган 12 соат тун бўлган.
Бугун эса суткада 24 соат кун. Мамлакат аҳли сокин уйқуга кетганда, дунёнинг бошқа қитъаси ухламайди. Биз эрталаб турганимизда биз учун сокин ўтган бу тунда анча воқеа, жараёнлар, ўзгаришлар рўй берган бўлади. Энди уйғониб уларни нафақат қувиб етиб олиш, балки ўзиб ҳам кетиш керак.
Дунёда кечаётган сиёсий, иқтисодий буҳронлар оқимида чўкиб кетмаслик учун ҳар дақиқада таҳдид солаётган глобал ўзгаришларни олдиндан кўра олишлик учун ҳозир олдингидан кўпроқ ишлаш керак. Керак бўлса, бедор бўлиш зарур.
Илгари қарорларни қабул қилиш осонроқ бўлган. Бугун Мирзиеёв, Путин, Трампга олдингиларга нисбатан оғирроқ. Чунки чегара билмас глобаллашув авжида, Интернет феномени ҳам мавжуд. Курраи замин аҳолиси саккиз миллиардга қараб кетяпти. Урушлар ва таҳдидлар ортмоқда. Оддий сув ёки бир парча ер учун қонли курашлар авж олмоқда. Бу пайтда эса Лидер қарорни етти ўлчаб, тез қабул қилиши керак. Чунончи, демократия сўзи «шунчаки» демократия учун ҳам ишлатилмаяпти. У воқеъликка айланиб бўлди.
Президентимиз Шавкат Мирзиеёв шахсига журналист эмас, балки оддий инсон сифатида назар солишга ҳаракат қилиб кўрдим.
Куни кеча халқимиз муборак Ҳайит байрамини кўтаринки кайфиятда кутиб олди. Кимдир қариндош уруғиникига, кимдир тобора чирой очиб бораётган шаҳримиз хиёбонларига, қизлар келин кўришга, эркаклар фотиҳага, кимдир эса ота-онасини кўриш учун туғилиб ўсган диёрига йўл олди.
Кўпчилигимиз оиламиз даврасида чиройли дастурхон ёзиб, байрамни хурсандчилик билан кутиб олдик. Мени ҳайратлантирган ва қалб кўзимни янада равшанлаштирган бир воқеа Шавкат Мирзиёев Ҳайит куни ҳеч ким ўйламаган жойга борди. Руҳий касалликлар шифохонаси ва Катталар мурувват уйига боришга мардлик ҳар кимга ҳам эмас. Айниқса йилда бир кун бўладиган байрамда.
Аслида бу дунёда ким соғлиги, ким заифлиги Аллоҳга маълум. Лекин айнан шу куни меҳрга мурувватга муҳтож, жамиятдан узилиб қолган одамлар ҳолидан хабар олиш тўғриси менинг ҳам, сизнинг ҳам хаёлимизга келмаган иш бўлди. Президент ҳам инсон, у ҳам йилда бир бўладиган байрамни қариндош уруғлар, яқинлар даврасида ўтказишга ҳаққи бор.
Лекин йўқ. Бу кунни ҳақиқий муҳтожлар етимлар ҳолидан, тақдири билан шу ҳолга тушиб қолган одамларнинг иссиқ совуғидан хабар олиш Аллоҳ наздида буюк ишдир. Ногаҳон кўз олдингизга VIII—IX асрдаги Шарқнинг буюк халқпарвар халифаси Хорун ар-Рашиднинг хайрли ишлари гавдаланади.
Шерзод Қудратхўжаев, Халқаро пресс-клуб раҳбари
Изоҳ (0)