Деҳлида Ўзбекистон–Ҳиндистон ҳамкорлик истиқболларининг муҳокамаси бўлиб ўтди

Деҳлида Ўзбекистоннинг Ҳиндистондаги элчихонаси Жавоҳарлал Неру номидаги университет билан биргаликда ўзбек–ҳинд муносабатларининг ривожланиш истиқболларига, шунингдек, жорий йилнинг 8 июнь куни Остонада бўлиб ўтган ШҲТ саммитига бағишланган давра суҳбати бўлиб ўтди, деб хабар берди «Жаҳон».

Тадбирда иштирок этган ижтимоий ва сиёсий, академик ҳамда экспертлар доираси вакилларига, шунингдек, Ҳиндистон ОАВ вакилларига икки томонлама муносабатларнинг ҳозирги даражаси ва иқтисодиёт, инвестиция, туризм, маданий-гуманитар соҳалардаги ҳамкорликлар бўйича батафсил маълумот бериб ўтилди.

Остона шаҳрида бўлиб ўтган ШҲТ саммити якунларига кўра Ўзбекистон Президенти Шавкат Мирзиёев ҳамда Ҳиндистон бош вазири Нарендра Модининг икки томонлама учрашуви ўзбек–ҳинд муносабатларида янги саҳифа очиб берди.

Остонадаги ШҲТ саммитининг асосий жиҳатларидан бири Ҳиндистоннинг Шанхай ҳамкорлик ташкилотига тўлақонли аъзо сифатида қабул қилингани бўлди.

Жавоҳарлал Неру университетининг Марказий Осиё ҳамда Россиядаги тадқиқот маркази директори Санжай Пандейнинг таъкидлашича, Ўзбекистон бугунги кунда Ҳиндистон учун Марказий Осиёдаги муҳим стратегик ҳамкор ҳисобланади.