British Petroleum’нинг маълумотларига кўра, Ўзбекистонда 2016 йилда нефть қазиб олиш 2015 йилга нисбатан 3,1 фоизга камайиб, 2,6 миллион тоннани ташкил қилди. Табиий газ қазиб олиш эса 8,4 фоизга ўсиб, 62,8 миллиард кубометрни ташкил қилди, деб ёзади Trend ахборот агентлиги.
Ўтган йили, British Petroleum’нинг маълумотларига кўра, Ўзбекистон 11,4 миллиард кубометр, шу жумладан, Россияга 5,6 миллиард кубометр, Хитойга 4,3 миллиард кубометр, Қозоғистонга 1,5 миллиард кубометр табиий газ экспорт қилган.
«Ўзбекнефтгаз» миллий холдинг компанияси озарбайжон ва туркман шериклар билан Каспий денгизи ҳавзасида бир нечта қўшма лойиҳани амалга оширишни режалаштирмоқда.
Аввалроқ «Ўзбекнефтгаз» бу йўналишда ҳамкорликдаги фаолиятни аниқлаштиришни кўзда тутувчи англашинув меморандумларини имзолаган эди.
Хусусан, «Туркменнебит» давлат концерни билан имзоланган меморандум «Каспий денгизининг Туркманистондаги конларини ўрганиш ва уларда нефть қазиб олиш бўйича ўзаро манфаатли ва узоқ муддатли ҳамкорликни ўрнатишни назарда тутади».
Озарбайжоннинг SOCAR компанияси билан имзоланган меморандум Ўзбекистон томонини амалда фойдаланилаётган конларга ҳамкор сифатида қабул қилишни кўзда тутган.
«Озарбайжон томони бизга денгизда ишлаш учун ходимлар тайёрлашга, иш учун технологик ва руҳан тайёрланишга ёрдам беради», — деган эди «Ўзбекнефтгаз» МХК бошқаруви раиси Алишер Султонов Халқаро пресс-клубнинг йиғилишида.
Халқаро бозорга чиқиш вазифасини соҳа олдига Ўзбекистон Президенти Шавкат Мирзиёев қўйган. 1992 йилдан бошлаб, ўзининг бутун фаолияти давомида «Ўзбекнефтгаз» Ўзбекистон ҳудудидан ташқарида лойиҳаларни амалга оширмаган.
200 дан ортиқ корхона ва компанияларни бирлаштирувчи «Ўзбекнефтгаз» МХКнинг қуввати бир йилда 60 — 70 миллиард кубометр табиий газ, саккиз миллион тонна суюқ углеводород қазиб чиқариш имконини беради.
Изоҳ (0)