Ўзбекистон Президенти Шавкат Мирзиёев 26 июнда Тошкент шаҳар руҳий касалликлар клиник шифохонасини бориб кўрди. Бу ҳақда ЎзА хабар берди.
Президент шифохонанинг эски биноларини янгилаш борасидаги лойиҳалар билан танишди. Беморларга яратилган шароитларни кўздан кечирди.
Ўзбекистон Республикаси Вазирлар Маҳкамасининг 2013 йил 25 июлдаги руҳий-тиббий хизмат фаолиятини такомиллаштиришга оид қарорига мувофиқ, шифохонада қурилиш-реконструкция ишлари амалга оширилмоқда. 2015—2016 йилларда 4 та янги бино фойдаланишга топширилди. Икки қаватли яна битта корпус қурилмоқда.
Давлат раҳбари шифохонанинг ташқи ва ички кўринишини тартибга келтириш, бу ерда ишлаётган тиббиёт ходимларининг ижтимоий ҳимоясини кучайтириш, хусусан, уларни уй-жой билан таъминлаш бўйича кўрсатмалар берди.
Президент Шавкат Мирзиёев Мирзо Улуғбек туманидаги «Мурувват» уйида ҳам бўлиб, беморлар учун яратилган шароит билан танишди.
1979 йилда қурилган интернатнинг бугунги кунда бино конструктив элементларининг техник ҳолати таъмирталаб. Давлат раҳбарига мазкур интернат ҳудудини кенгайтириш ва қўшимча бинолар қуриш лойиҳаси ҳақида маълумот берилди.
«Улуғ айём кунлари бундай савоб ишларни қилиш, беморлар ҳолидан хабар олиш ҳар биримизнинг эътиборимизда бўлмоғи зарур», — деди давлат раҳбари.
Президент мазкур шифохона ҳудуди ёнида қўшимча қурилиш ишлари олиб бориш, касалликларнинг турига қараб алоҳида бинолар қуриш ва жойлаштириш бўйича кўрсатмалар берди.
Изоҳ (0)