АҚШ ҳарбий-ҳаво кучларининг Небраска штатидаги Оффут базасига жойлаштирилган самолётлари, шу жумладан, оммавий низолар вақтида олий раҳбариятнинг ҳаво қўмондонлиги пунктига айланадиган иккита E-4B самолётига торнадо сабабли зарар етди. Бу ҳақда CNN телеканалига таяниб, «ТАСС» хабар бермоқда.
АҚШ ҳарбий-ҳаво кучлари вакилининг журналистларга маълум қилишича, ҳодиса 16 июнда юз берган. Ҳаммаси бўлиб 10 та самолёт зарарланган. Улар қаторида Boeing корпорацияси маҳсулоти бўлган иккита E-4B ҳам бор. Бу самолётлар АҚШда «қиёмат куни самолётлари» деб аталади. Самолётлар ядровий уруш ҳолатида ер усти бошқарув иншоотлари йўқ қилинган тақдирда ҳаракатга келишга мўлжалланган.
АҚШ ҳарбий-ҳаво кучларининг маълумотига кўра, бу самолётлар АҚШ президенти ва мудофаа вазири, шунингдек, қуролли кучлар штаб бошлиқлари қўмитаси учун мўлжалланган. Битта шундай самолётнинг нархи ўртача 200 миллион долларни ташкил қилади.
«РИА Новости»нинг ёзишича, Boeing E-4B 1970 йилларда совуқ уруш даврида яратилган. У ядровий уруш ҳолатида осмонда бир неча кун давомида парвоз қила олади. CNN маълумотларига кўра, АҚШ ҳарбий-ҳаво кучларининг ихтиёрида камида тўртта E-4B доимий тайёр ҳолатда туради. Улардан бири бир неча дақиқа ичида парвозга тайёр бўла олади ва давлат раҳбарини сафарлар давомида кузатиб боради. Торнадо юз берган куни бу самолёт базада бўлмаган.
Шунингдек, торнадо оқибатида саккизта Boeing RC-135 разведкачи самолётга ҳам зарар етган. Улардан олтитаси аллақачон таъмирланган ва парвозга тайёр.
Изоҳ (0)