Шавкат Мирзиёев: Одамларимиз ҳамиша ҳам меҳнатига яраша даромад олмаган. Бу адолатсизликка чек қўймоқ зарур

Шавкат Мирзиёев Фарғона вилоятига ташрифи доирасида сифатли мева-сабзавот етиштириш ва аҳолининг ушбу маҳсулотларга бўлган эҳтиёжини таъминлаш, экспорт салоҳиятини юксалтириш юзасидан амалга оширилаётган лойиҳалар билан танишди. Бу ҳақда ЎзА хабар берди.

«Миндонобод агросаноат» агрофирмаси узумчиликка ихтисослашган бўлиб, 720 гектарга саноатбоп узум навлари экилган. Корхона йилига беш минг тонна маҳсулот етиштириш, уч минг тонна узумни бирламчи қайта ишлаш, 650 минг дона брикет ишлаб чиқариш қувватига эга. Бунинг учун 89 киши доимий, 300 дан ортиқ киши мавсумий ишга жалб этилган. Токзорларни парваришлашда томчилатиб суғориш технологиясидан фойдаланилади.

Агрофирма томонидан мавжуд токзорларни минг гектарга етказиш орқали йилига 15 минг тонна узум етиштириш, бир миллион АҚШ доллари миқдоридаги маҳсулотни экспортга йўналтириш кўзда тутилмоқда. Натижада 450 минг туп ток қаламчаси ўтқазилиб, Хитойнинг қуёш энергиясида ишлайдиган суғориш тизимлари ўрнатилади. Ушбу лойиҳа тўла ишга тушгач, 250 киши иш билан таъминланади.

Давлат раҳбари кичик бизнес ва хусусий тадбиркорлик учун барча йўллар очилганини, куни кеча эълон қилинган «Маҳаллий экспорт қилувчи ташкилотларни янада қўллаб-қувватлаш ва ташқи иқтисодий фаолиятни такомиллаштириш чора-тадбирлари тўғрисида»ги қарор соҳа вакилларининг янада самарали фаолият юритиши учун кенг имконият яратишга қаратилганини таъкидлади.

Фарғона вилоятида тадбиркорлик илмини эгаллаган уддабурон ишбилармонлар кўп. Аммо одамларимиз ҳамиша ҳам меҳнатига яраша даромад олмаган. Бу адолатсизликка чек қўймоқ зарур. Янги қарор билан яратилаётган имтиёзлар уларнинг қилаётган ишидан манфаат топишига, ўзи, оиласи ва жамият учун фойда келтиришига, фаровон ҳаётга эришишига, уйлар қуриб, фарзандларининг орзу-ҳавасини кўришига хизмат қилади.

Шавкат Мирзиёев, Ўзбекистон Президенти

Қува туманидаги Big agro logistic масъулияти чекланган жамияти томонидан мева-сабзавотни қайта ишлаш, қуритиш, қадоқлаш ва экспорт қилишга мўлжалланган замонавий логистика маркази ташкил этилмоқда.

Лойиҳанинг умумий қиймати 7,2 миллион доллар бўлиб, биринчи йилда 6,5 миллион доллар, беш йилдан сўнг 10 миллион доллар миқдоридаги маҳсулот экспорт қилиш мўлжалланмоқда. Логистика марказига Италия ва Туркиядан келтириладиган технологик линиялар ўрнатилади. беш минг тонналик совутгич, етти минг тонна мева-сабзавотни қайта ишлаш қувватлари ташкил этилади. Лойиҳа ишга тушгач, 180 та иш ўрни яратилади.

Қўқон шаҳридаги «Элит консерва» масъулияти чекланган жамиятида мева-сабзавотларни қадоқлаш, Олтиариқ туманидаги Эcо Эхпорт Траде масъулияти чекланган жамиятида қишлоқ хўжалик маҳсулотларини саралаш, қуритиш ва сақлашга мўлжалланган лойиҳалар амалга оширилмоқда. Мазкур лойиҳалар вилоят экспорт салоҳиятини янада мустаҳкамлаш, янги иш ўринлари яратиш ва аҳоли фаровонлигини оширишда алоҳида аҳамиятга эга.

Бу йил Қува туманидаги «Фарғона анорзори» масъулияти чекланган жамиятида 50 гектарда янги анорзор барпо этилган. Ушбу боғни агротехника қоидалари асосида парваришлаш натижасида келгусида 700 тоннадан ортиқ ҳосил олиш режалаштирилмоқда. Анорзор қатор ораларига помидор, бодринг, булғор қалампири ва бошқа сабзавотлар, дуккакли экинлар экилган.

Агрофирма томонидан келгуси йилларда анорзорларни икки минг гектарга, ҳосилдорликни 30 минг тоннага етказиш мўлжалланмоқда.

Президент Қува ва Дашнобод анори дунёга машҳур экани, ҳар иккала навнинг ўзига яраша хусусиятлари мавжудлигини таъкидлади. Анор чиқитсиз маҳсулот бўлиб, пўстлоғидан кимё саноатида ранг олишда, фармацевтикада хом ашё сифатида фойдаланиш мумкинлиги қайд этилди. Вилоятда анорзорларни янада кенгайтириш ва ушбу маҳсулот экспортини кўпайтириш юзасидан мутасаддиларга тегишли тавсиялар берилди.

Миллий банк томонидан вилоятда қишлоқ хўжалик маҳсулотлари етиштириш ва қайта ишлаш бўйича амалга оширилаётган лойиҳалар намойиш қилинди. Қиймати 64,4 миллион доллар бўлган ушбу лойиҳалардан 10 таси Хитой тараққиёт банки, Осиё тараққиёт банки, Ўзбекистон тикланиш ва тараққиёт жамғармаси томонидан молиялаштирилган. Йил охирига қадар яна бештани лойиҳани молиялаштириш кўзда тутилган. Бунинг самарасида 2017—2018 йилларда 68 минг тоннадан зиёд мева-сабзавот қайта ишланиб, 25,7 миллион долларлик маҳсулот экспорт қилинади.

Давлат раҳбари Учкўприк туманидаги собиқ консерва заводи негизида амалга оширилаётган лойиҳани ҳам кўздан кечирди.

Лойиҳа ташаббускори «Воллей Моунтаинс Фреш» масъулияти чекланган жамияти бўлиб, 10,5 миллиард сўм, жумладан, «Ипотека-банк»нинг 7,4 миллиард сўм кредити ҳисобига корхонанинг мавжуд қувватлари модернизация қилинади, мевани сақловчи музлатгич ва қадоқловчи ускуналар ўрнатилади.

2018 йилнинг биринчи чорагида лойиҳанинг  биринчи босқичи, тўртинчи чоракда иккинчи босқичи ишга туширилади. Натижада минг тонна томат пастаси, шунча пюре ва концентрат, мева-сабзавот консервалари аҳоли истеъмоли учун етказиб берилади. Маҳсулот экспортга ҳам йўналтирилади. Ушбу лойиҳа ишга туширилиши натижасида 170 та иш ўрни ташкил этилади.

Президент вилоятда қайта ишлаш саноатини ривожлантириш учун барча имконият, хом ашё ва ишчи кучи мавжудлигини таъкидлади. Улардан унумли фойдаланиш, тармоққа тадбиркорларни кенг жалб этиш бўйича мутасаддиларга зарур топшириқлар берди.