Лондоннинг Финсбери-паркидаги масжид яқинида амалга оширилган теракт ижрочиси 47 ёшли Даррен Осборн ҳисобланади. Бу ҳақда «ТАСС» хабар бермоқда.
Sky News телеканалига кўра, Осборн аввалига қотилликка қасдда гумон қилиниб ҳибсга олинди. Кейинроқ унга аксилтеррор қонунчиликни бузиш айби қўйилди: Осборн террорчилик актига тайёргарлик, бунга ундаш ва амалга ошириш, жумладан, қотиллик ва қотилликка қасдда айбланмоқда.
Скотленд-Ярд Финсбери-паркдаги ҳодиса муносабати билан полиция Уэльс пойтахти Кардиффдаги турар-жойлардан бирида тинтув ўтказилаётганини билдирди.
Эслатиб ўтамиз, 19 июнь, душанба куни тунги пайт оқ фургон Финсбери-паркдаги масжиддан қайтаётган мусулмонлар устига бостириб борди. Машина ҳайдовчиси оломон томонидан қўлга олинди ва полицияга топширилди.
Ҳодиса оқибатида бир киши ҳалок бўлди, 10 киши яраланди. Улардан иккисига воқеа жойида ёрдам кўрсатилди, 8 киши касалхонага ётқизилди.
Изоҳ (0)