Ҳиндистоннинг «Newsnation.in» нашри хабарига кўра, шу йилнинг апрелида Ҳиндистонга ўзбекистонлик тадқиқотчилар Заҳириддин Муҳаммад Бобурнинг Ҳиндистондаги ҳаёти ҳақидаги маълумотларни, унинг Бобурийлар империяси асосчиси сифатидаги меросини, шунингдек, ўша даврдаги Ўзбекистон ва Ҳиндистон тарихий-маданий алоқаларини ўрганиш мақсадида ташриф буюрди. Ишлар бутун дунё бўйлаб Ўзбекистон ҳақидаги тарихий маълумотларни йиғишга қаратилган «Ўзбекистоннинг маданий мероси дунё бадиий тўпламларида» лойиҳаси доирасида амалга оширилмоқда.
Ўзбекистонлик экспертлар учун Ҳиндистон Миллий музейидаги ўша даврга тегишли тарихий ҳужжатлар, шунингдек, Ўзбекистонда яратилган ва Бобурий ҳукмдорларга ҳадя этилган Муқаддас Қуръон қўлёзмаси, бундан ташқари, Бобурнинг ҳаёти ҳақидаги «Бобурнома» китобининг туркий тилдаги 15 та нусхаси алоҳида аҳамият касб этади.
Таъкидланишича, Ўзбекистонда Бобурни давлат даражасида буюк тарихий арбоб сифатида ҳурматлашаётган бир пайтда Ҳиндистон тадқиқот доираларида унинг ушбу мамлакат тарихидаги роли ҳақида баҳслашишда давом этишмоқда. Ўнг қараш тарафдорлари Бобурни ва бошқа бобурийлар ҳукмдорларини Ҳиндистонни талон-тарож қилган ва ўз ҳукмдорлиги охиригача шундай бўлиб қолган «босқинчилар» сифатида баҳоламоқда.
Ҳиндистоннинг ўта ўнг «Бхаратия жаната парти» партияси Ҳиндистонда Бобурийлар сулоласи вакиллари шарафига номланган кўчалар номларини ўзгартириш ташаббусини илгари сурмоқда.
«Аврангзеб: Одам ва Афсона» китоби муаллифи, тарихчи Одри Трушке фикрича, ҳозирда Бобурийларга отилаётган таъна тошлари Ҳиндистон тарихига алоқадор эмас. Бу кўпроқ мамлакатнинг жорий сиёсати билан боғлиқ. Унинг сўзларига кўра, «Ҳиндистон маданий, тилшунослик, сиёсий ва иқтисодий жиҳатдан айнан Бобурийлар томонидан шакллантирилган».
Изоҳ (0)