«Ҳали бизни судга чақиришмади». Шароф Муқимов турмуш ўртоғи Севинч Мўминова билан ажрашганини рад этди

Хонанда Шароф Муқимов турмуш ўртоғи Севинч Мўминова билан қонуний ажрашгани ҳақидаги хабарларни рад этди. Бу ҳақда у журналист Феруз Муҳаммадга берган интервьюсида маълум қилди.

Аввалроқ хонанда Севинч Мўминова Шароф Муқимов билан қонуний тарзда ажрашганини маълум қилган эди. Севинч Мўминова бу ҳақда 5 июнь куни «Shok.uz» сайтига интервью берган бўлиб, 6 июнь куни ажрим бўйича суд бўлиб ўтишини маълум қилган эди.

Шароф Муқимовнинг сўзларига кўра, у ҳақиқатан ҳам Севинч билан ажрашиш учун судга ариза берган, бироқ ҳали «ажрашгани йўқ, ҳали уларни судга ҳам чақиришмаган».

Ёш бола вақтимиз катталар бизга эртак айтарди — мен ва Севинчнинг ажрашганимиз ҳақидаги гаплар эса катталарнинг эртагидан бўлибди.

Жаҳлим чиққанида, нимадандир сиқилганимда ё бошқа бир сабаб билан ҳар хил гап-сўзларни айтиб юборсам бўларди. Аммо ўтган бахтли кунларимиз, Севинч фарзандимнинг онаси эканлигини ўйлаб, ҳар қандай вазиятда ҳам ўзимни тутиб тураман. Бошқалар бизнинг оиламиз ҳақида бўлар-бўлмас гаплар айтишига имконият яратиб қўйишдан қўрқаман.

Бизни муҳокама қилаётганларга эса улар аввало ўз оиласи билан машғул бўлиб, оилавий ташвишлари билан куйиб-ёнишсин, деган бўлардим.

Ажрашиш ҳақида судга ариза берганмиз, аммо ажрашганимиз йўқ — ҳали бизни судга ҳам чақиришмади.

Шароф Муқимов, хонанда

Севинч Мўминова 2016 йилнинг декабрь ойида берган интервьюларининг бирида Шароф Муқимовга хусумати йўқлиги, у билан қонунан ажрашиб кетса ҳам, «ҳали турмушга чиқиш ниятим йўқ»лигини маълум қилган эди. Шароф Муқимов эса 2016 йил августида берган интервьюсида «кимга, қачон уйланишимни вақт кўрсатиши»ни айтиб ўтган эди.

Маълумот учун, Шароф Муқимов ва Севинч Мўминова 2010 йилда турмуш қурган. Уларнинг Лейла исмли қизи бор.