Шаҳноза Отабоева: Тўйга пул учун бормаганман

Аввалроқ, хонанда Шаҳноза Отабоеванинг лицензияси тугатилгани ҳақида маълум қилинганди. Журналист Феруз Муҳаммад хонанда билан боғланиб, бўлган воқеага ойдинлик киритди.

Мазкур тўй Сурхондарё вилоятида бўлиши керак эди, тўй хизмати эса бир ой аввалдан олиб қўйилганди. Давлат тадбири борлигини тўйчиларга айтганимда, улар Жиззахга, сафарда турар-жойимиз бўлган «Дипломат» меҳмонхонасининг тагига келиб олишди. «Халқ сизни кўраман деб ният қилган, эртага олиб келиш қўлингдан келмабди деган гапни кўтара олмаймиз, бизни шарманда қилманг, керак бўлса порталга ҳам ёзамиз, агар бормасангиз ўзимни осаман», деб меҳмонхонамни олдида туриб олишди.

«Ўзбекнаво»даги Одил акага «акажон, майли мен тадбирда қолишим учун, бирор вариант қилиб, ўрнимга машҳурроқ санъаткорни юборайлик», деб илтимос қилдим. Одил ака «100 % гарантия бераман Шаҳноза бормайди», деб туриб олдилар.Бўлмаса «Ўзбекнаво»дагиларга бўлаётган вазият ҳақида уч кун олдин хабар берганман, барча репитицияларга қатнашганман. 23 май куни тадбирдан олиб ташлашганида, тўй эгаларига телефон қилиб, «бўлди, сиқилманглар, тадбирдан олиб ташлашди, бораман», дедим. Улар «ниятимиз холис экан», деб хурсанд бўлишди.

24 май куни «Жаннатмакон Ўзбекистон» деб номланган қўшиғимни олиб ташлаб, «Водийларни яёв кезганда» деб номланган қўшиғимни тадбирга қўшишди. Бундай вазиятда қандай қилиб, тўй эгаларига «яна бора олмаймандиган бўлиб қолдим» дейман.Икки ўт орасида қолиб кетдим, на« Ўзбекнаво», на тўй эгалари аҳволимни тушунишди.

Тўйга пул учун бормадим, ҳеч қачон туғилиб ўсган юртимнинг, яъни Сурхондарё вилоятининг тўйларида «мана бунча пул берасанлар» демаганман.Кўп пул ҳам олмагандим, пул учун тадбирни ташлаб кетмадим. У ерда қариндошларим яшайди, туғилиб ўсган юртимга яна боришимни ўйлашим керак эди. Эртага катта муаммо бўлмасин деб, тўйга кетишга мажбур бўлдим.

Кеча «Ўзбекаво»га бориб, тушунтириш хатини ёздим. «Одил акага айтганман» дейишимга қарамасдан расмий билдириш чиқариб юборишди.Пушаймонман, қиз бола бошим билан бу масалага ечим топа олмадим. Бир томонга қарасам халқ тўйи, бир томонда давлат тадбири, халқ кўтарилиб кетишидан, мисқоллаб йиғган обрўйим тўкилишидан қўрқдим. Юрагим оғриб қолди, тўйда хизматда вақтимда ҳам дори ичиб зўрға бир аммаллаб тўйни ўтказдим.

Шаҳноза Отабоева