Жасурбек Иброҳимовнинг дўппосланишида иштирок этган Ислом Тўлагановнинг онаси: болам қонун олдида қилган иши учун жавоб берсин

Коллеждошлари томонидан аёвсиз дўппосланган ва 1 июнда вафот этган Жасур Иброҳимовнинг иши юзасидан тарқалаётган турли хабарларга ойдинлик киритиш мақсадида Тошкент шаҳар ИИББ бир қатор ОАВларни Миробод туман ИИБга таклиф қилди.

Бу учрашувда Жасур Иброҳимовни калтаклашда иштирок этган Ислом Тўлагановнинг ота-онаси, марҳум йигитнинг синфдошларидан бирининг онаси, ҳолат юзасидан ташкил этилган петициянинг ташкилотчилари иштирок этди.

Юз берган воқеадан биз жуда қайғудамиз. Мен бу ерда биз айбдор эмасмиз деб айта олмайман. Мен ҳар доим ўғлимга яхши ўқиш кераклигини айтганман. 2 майда мен уни ўқишга олиб боришим керак эди. Унинг дарси тушдан кейин экан. Унинг дарси соат 13:30 да бошланиши керак бўлган, биз коллежга 13:00 да етиб бордик. Бу вақтда Дилшод Абдуллаев ва марҳум Жасур Иброҳимов коллеж олдида гаплашиб турган эди.

Ўғлим улар билан саломлашди. Уларнинг яқинида туриб суҳбатларини эшитдим. Дилшод Абдуллаев «Жасур менинг синглимга гап отяпти», — деди. Ислом «Дилшод ака, қўйинг, Жасурнинг жароҳати бор, у касал бўлган», — деди. Шундан сўнг Дилшод кетди.

Абдужалил Расулов, Ислом Тўлагановнинг отаси

Исломнинг отаси айтишича, воқеа юз берганидан сўнг у Дилшод билан гаплашган. Дилшод унга Жасур билан гаплашганини ва унга синглисига бошқа гапирмаслигини айтган. Шундан сўнг улар келишиб кетган.

Исломнинг отаси воқеа юз берганидан сўнг коллежга видеокамералардаги тасвирларни кўриш учун борган. Унинг айтишича, эртаси куни, яъни 3 майда тахминан соат 14:00 да ўғли коллеж ҳовлисига чиққанда Жасур ўзининг курсдошлари Тимур ва Бекзод билан ҳовлида бўлган ва Исломни чақирган. Ислом уларнинг олдига келганда, Жасур ундан «кеча нега мени жароҳат олган, касал бўлган деб айтдинг»,— деб сўраган. Ислом эса «буни сени фойданг учун айтдимку, агар хафа қилган бўлсам, узр», — деган. Ислом яна бир марта узр сўрамоқчи бўлганда, Жасур унинг юзига урган. Шундан сўнг Ислом Жасурга «Сен шундан хурсанд бўлдингми?», — деб айтган ва ўқув биноси томонга кетган.

«Жасурнинг куратори ҳам у Исломни урганини айтди. Агар бизга бундай маълумот келмаганда эди, биз коллежга видеоёзувларни кўриш учун бормаган бўлардик. Биз бунга ишонч ҳосил қилиш учун бордик. Кураторнинг сўзларидан сўнг биз коллеж директори, директор ўринбосари ва Исломбек билан биргаликда кузатув камералари ёзган тасвирларни кўрдик», — деб сўзида давом этди Ислом Тўлагановнинг отаси.

Абдужалил Расулов ўғли Ислом Тўлагановнинг сўзларига ва кузатув камераларидаги тасвирларга таяниб айтишича, юқоридаги вазият юз бергандан бироз вақт ўтиб, Жасур учинчи курсда ўқийдиган Тимур ва Ҳурмат, Жасурнинг курсдошлари Тимур ва Бекзод ҳамда Ислом коллеждан чиқиб, кўчада гаплашган.

Кўчада учинчи курсда ўқийдиган Тимур Жасур ва Исломдан нима бўлаётганини сўраган. Ислом эса юқорида келтириб ўтилган воқеани айтиб берган. Тимур эса Жасурга бекорга Исломни урганини ва улар ярашиб олиши кераклигини айтган. Жасур Ислом билан уришмоқчилигини айтиб, буни талаб қилган. Шундан сўнг улар уришиш учун кетган. «Жасур аввал кураш билан шуғулланган. У усул қўллаб, Исломнинг қўлини қайирган ва улар йиқилган. Шу вақтда учинчи курсда ўқийдиган Ҳурмат югуриб келиб, уларни ажратган», — деди Исломнинг отаси сўзида давом этиб.

Отанинг сўзига кўра, шундан сўнг, улар ажралиб кета бошлаган. Жасур орқадан Исломга қараб югуриб кела бошлаган. Ислом эса ўнг оёғини кўтарган ва тирсаги билан юзини тўсган. Жасур унинг оёғига қорни билан урилган. Кейин эса улар стоматология яқинида Жасурнинг қонаган жойларини ювган.

Тергов ҳаммасини ўрганиб чиқишини хоҳлардим. Мен ўйлайманки, тергов ягона қонуний фикрга келади. Нима бўлганини, қандай бўлганини аниқлайди. Ўғлим бўлса ҳам унинг бу ҳаракатини оқламайман. Мен уни бундай тарбияламаганман.

Ислом Тўлагановнинг отаси

«Фарзандимизга бундай тарбия бермаган эдик. Ҳар доим орқангдан биров келиб тепса, «кечирасиз», деб айтгин дерди отаси. Ҳеч қачон бировга қўлингни теккизма, деб тарбия қилганмиз. Лекин мана бир ойдан бери мен умуман боламни ўйлаганим йўқ. Болам қонун олдида қилган иши учун жавоб берсин. Мен мингдан-минг розиман. Шу болага 10 кунлаб қараганим ҳам йўқ. Биз фақат Жасур билан овора бўлдик. Худодан шу бола тузалиб кетишини ва ҳақиқатни айтишини тилаган эдим. Қонун доирасида чора кўринглар. Мен она бўлсам ҳам, розиман. Майли қонун ҳал қилсин. Мана бир ойдан бери келиб, ҳаммасига жавоб беряпти. Бундан кейин ҳам жавоб беради», — деб кўзида ёш билан гапирди Ислом Тўлагановнинг онаси Зумрад Мамбетова.

Жасурнинг онаси томонидан ёзилган мурожаатда Исломнинг отаси 5 майда касалхонага Жасурни кўргани келгани айтилган. Тарқалган хабарларга кўра, Исломнинг отаси Жасурга таҳдид қилишидан қўрқиб, уни Жасурнинг олдига киришга қўйишмаган. Бироқ Исломнинг отаси таъкидлашича, бош шифокор уларга Жасурни кўришга 30—40 сония рухсат берган. «Биз болани аҳволини кўриб туриб, қандай таҳдид қиламиз? Ҳеч қандай таҳдид бўлмаган. Мен бир мартагина кирдим. Унинг аҳволини сўрадим. Биз бошқа кирмадик, ота-онаси билан, шифокорлар билан гаплашдик», — деди Исломнинг онаси бу хабарларга жавобан.

Шу билан бир вақтда яна бир масалада чигаллик юзага келмоқда. Жасурнинг онаси кузатув камералари тасвирларини сўраб борганда воқеа юз берган куни видеокамералар тасвирни ёзмагани айтилган. Исломнинг отаси эса бўлиб ўтган воқеаларни кузатув камераларидаги тасвирга асосланиб айтиб бермоқда. Бу ҳолатга ойдинлик киритиш тергов томонидан амалга оширилиши Тошкент шаҳар прокурори ўринбосари Фатҳулла Абдураҳимов томонидан қайд этилди.

Ислом Тўлаганов 31 майда терговга келган. Муштлашув вақтида у бошидан жароҳат олган. Айни вақтда у Тошкент шаҳрида. Петиция давомида Исломнинг руҳий касалликка учрагани ва айни вақтда даволанаётгани ҳақида билдирилган фикрларни Исломнинг ота-онаси рад этди.

Жасурнинг синфдошларидан бирининг онаси марҳум ўсмирнинг ота-онаси ва ўртоқларининг сўзларига таяниб қуйидагиларни маълум қилди. Жасур ва Ислом ўртасидаги «ҳикоя» бир йил давом этган. У буни Жасурнинг ўртоқлари сўзларига таянган ҳолда айтди. Унинг айтишича, икки ўсмир бир йил аввал бир қизнинг устидан тортишган. Бир йил ичида нима бўлгани ҳақида аёл ҳеч нарса дея олмади. Воқеа Жасур синфда навбатчи бўлган куни юз берган. Ахлатни ташлаш баҳонасида Ислом Жасурни ахлат ташлайдиган жойга бошлаб борган. У ерда Жасурни олти киши кутиб турган. Муштлашув бошланган. Жасур ҳушини йўқотгач, олти киши бўлиб уни дўппослашган.

Миробод тумани ИИБ томонидан ҳолат юзасидан 4 майдан бошлаб тергов олди текшируви олиб борилган. Жиноят Кодексининг 104-моддаси учинчи қисми билан 31 майда жиноят иши қўзғатилган.

Жиноят ишининг дарҳол қўзғатилмаганига сабаб сифатида Жасур Иброҳимовнинг дастлаб «ариққа йиқилиб тушдим», деб берган кўрсатмаси келтирилмоқда.

Ислом Тўлагановнинг ота-онаси ва Жасур Иброҳимовнинг синфдошларидан бирининг онаси томонидан айтилган маълумотлар қанчалик ростлиги тергов давомида аниқланади.