Номаълум шахс йўловчи ниқобида Рашид Бекмурадов бошқарувидаги Nexia русумли автоуловда Юнусобод туманидаги манзилига етиб келгач, тўсатдан ошхона пичоғидан қурол сифатида фойдаланиб, ҳайдовчига ҳужум қилган ва 220000 сўм пулини эгаллаб, жиноят жойидан яширинган. Бу ҳақда Тошкент шаҳар ИИББ матбуот хизмати маълум қилди.
Мазкур ҳолат юзасидан Юнусобод тумани ИИБ ҳузуридаги Тергов бўлими томонидан босқинчилик аломатлари билан жиноят иши қўзғатилган эди.
Тошкент шаҳар ИИББ ходимлари томонидан олиб борилган қатъий саъй- ҳаракатлар натижасида мазкур жиноят муқаддам бир неча маротаба судланган Шуҳрат Усманов томонидан содир этганлиганлиги аниқланиб, ундан ошхона пичоғи далилий ашё сифатида олинган.
Ҳозирда Усманов ушланиб, унга нисбатан қамоққа олиш тарзидаги эҳтиёт чораси қўлланилган. Дастлабки тергов ҳаракатлари давом эттирилиб, унинг бошқа жиноятларга алоқадорлиги текширилмоқда.
Юқоридаги шахснинг ҳатти-ҳаракатидан жабр кўрганлар бўлса, «102» телефон рақамига ёки ички ишлар идораларига мурожаат этиши мумкин.
Изоҳ (0)