Ўзбекистон Республикаси норматив ҳуқуқий ҳужжатлар муҳокамаси порталига «Шаҳар йўловчи транспортидан бепул фойдаланиш тартиби тўғрисида»ги қонунга киритиладиган тузатишлар лойиҳаси жойланди, деб ёзади Norma.
Айни пайтда мамлакатда яшаётган ядро полигонлари ва бошқа радиация-ядро объектларида ҳарбий хизматни ўтаган кишилар сони жами 254 нафарни ташкил қилади. Уларнинг 103 нафари ёш бўйича ёки ногиронлик бўйича нафақахўр.
Президентнинг 2002 йилги фармони билан ушбу категориядаги фуқароларга имтиёзлар, шу жумладан, қишлоқ жойларда умумий фойдаланиладиган автомобиль транспортида, шаҳардан ташқарида қатнайдиган темирйўл транспортида ва шаҳардан ташқарида қатнайдиган автобусларда бепул юриш имконияти тақдим этилган.
Шу муносабат билан ядро полигонлари ва бошқа радиация-ядро объектларида ҳарбий хизматни ўтаган пенсия ёшидаги ногиронларни «Шаҳар йўловчи транспортидан бепул фойдаланиш тартиби тўғрисида»ги қонун билан тасдиқланган имтиёзли фуқаролар рўйхатига киритиш таклиф этилди.
Изоҳ (0)