Ўзбекистон Президенти Шавкат Мирзиёевнинг 2017 йил 12 январдаги «Китоб маҳсулотларини чоп этиш ва тарқатиш тизимини ривожлантириш, китоб мутолааси ва китобхонлик маданиятини ошириш ҳамда тарғибот қилиш бўйича комиссия тузиш тўғрисида»ги фармойиши ёшларда китобхонликни оширишда муҳим дастуриламал бўлмоқда.
Ўзбекистон Биринчи Президенти Ислом Каримов «Адабиётга эътибор – маънавиятга, келажакка эътибор» рисоласида халқнинг фидокорона меҳнатини, буюк бунёдкорлик салоҳиятини, замондошларнинг маънавий-руҳий дунёсини, баркамол авлод тарбиясидаги эзгу интилишларни теран бадиий акс эттиришда миллий адабиётнинг ўрни ва аҳамияти ғоят катта эканини таъкидлайди.
Бугунги глобаллашув даврида талаба-ёшларнинг китобга меҳрини янада кучайтириш, уларнинг билим ва кўникмаларини бойитиш, ўғил-қизларни миллат учун ёт ва зарарли таъсирлардан ҳимоялаш, фаол фуқаролик позициясини шакллантириш долзарб вазифа бўлиб турибди. Тошкент молия институти томонидан бошқа бир қатор ташкилотлар ҳамкорлигида атоқли ёзувчи ва шоирлар, ижодкорлар, маънавият тарғиботчилари билан учрашувлар ўтказиб келинмоқда.
31 май куни институтнинг «Бюджет ҳисоби» кафедраси томонидан институтнинг Бюджет ҳисоби ва давлат жамғармалари факультети 407-аудиториясида кафедра ҳафталиги доирасида «Китоб мутолааси ва китобхонлик маданиятини ошириш» мавзусида маънавий-маърифий тадбир ўтказилди.
Тадбирда Ўзбекистонда хизмат кўрсатган маданият ходими, халқ таълими аълочиси, «Шуҳрат» медали соҳиби шоира Умида Абдуазимова, «Чет тиллари» кафедраси катта ўқитувчиси Муборак Бозорова, факультет раҳбарияти, кафедра профессор-ўқитувчилари ва факультет талабалари иштирок этди.
Таъкидлаш жоиз, Умида Абдуазимованинг «Севинчим», «Сени кўргим келаверади», «Аразламанг», «Салом, ҳаёт», «Қадимий қўшиқ», «Ойдин орзулар», «Умрим зийнати», «Оймома боғ» номли ўндан ортиқ шеърий ва публицистик тўпламлари ўз китобхонларини топган.
Садафбиби Абраева, Тошкент молия институти ўқитувчиси
Изоҳ (0)