Бали оролидаги Улувату ҳинд ибодатхонаси атрофида яшайдиган макакалар уюшган ҳолда жиноятни амалга оширишга ўрганиб олди: улар туристларнинг фотоанжомларини, кийим ва пулларини ўғрилаб овқат эвазига қайтариб бермоқда, деб хабар берди National Geographic.
Бельгия ва Канада зоологлари ушбу вазиятдан фойдаланиб, приматлар популяциясига хос бўлмаган хатти-ҳаракатни ўрганишга қарор қилди. Аниқланишича, макакалар ўз жиноий кўникмаларини авлоддан авлодга қолдиради, улар болаларини ўғрилик ва одамларни шантаж қилишга ўргатади. Бундан ташқари ибодатхона яқинига «малакасини ошириш мақсадида» бошқа тўдалардан катта маймунлар ҳам келади.
Балидаги ибодатхона маймунлари оч қолмайди: туристлар доим уларга емиш бериб туради. Одамларнинг қимматбаҳо нарсаларини олиб қўйиб, уларни овқатга алмаштириш одати узоқ вақт давом этган ўзаро таъсир натижасида пайдо бўлган. Алмашишлар доим ҳам одамлар фойдасига ҳал бўлмайди: баъзида туристлар маймунларга «товон»ни тўлаганидан сўнг ҳам ўз буюмини қайтариб ололмайди.
Макакалар асосан кўзойнакларни, бош ва оёқ кийимларини ўғрилайди. Олимларнинг аниқлашича, ўғриликни урғочи маймунларга қараганда эркаклари тез-тез амалга оширади.
Изоҳ (0)