Jazosiz qolayotgan jinoyat: Bali orolidagi makakalar uyushgan jinoiy guruh tuzib oldi

Bali orolidagi Uluvatu hind ibodatxonasi atrofida yashaydigan makakalar uyushgan holda jinoyatni amalga oshirishga o‘rganib oldi: ular turistlarning fotoanjomlarini, kiyim va pullarini o‘g‘rilab ovqat evaziga qaytarib bermoqda, deb xabar berdi National Geographic.

Belgiya va Kanada zoologlari ushbu vaziyatdan foydalanib, primatlar populyatsiyasiga xos bo‘lmagan xatti-harakatni o‘rganishga qaror qildi. Aniqlanishicha, makakalar o‘z jinoiy ko‘nikmalarini avloddan avlodga qoldiradi, ular bolalarini o‘g‘rilik va odamlarni shantaj qilishga o‘rgatadi.  Bundan tashqari ibodatxona yaqiniga “malakasini oshirish maqsadida” boshqa to‘dalardan katta maymunlar ham keladi.

Balidagi ibodatxona maymunlari och qolmaydi: turistlar doim ularga yemish berib turadi. Odamlarning qimmatbaho narsalarini olib qo‘yib, ularni ovqatga almashtirish odati uzoq vaqt davom etgan o‘zaro ta’sir natijasida paydo bo‘lgan. Almashishlar doim ham odamlar foydasiga hal bo‘lmaydi: ba’zida turistlar maymunlarga “tovon”ni to‘laganidan so‘ng ham o‘z buyumini qaytarib ololmaydi.

Makakalar asosan ko‘zoynaklarni, bosh va oyoq kiyimlarini o‘g‘rilaydi. Olimlarning aniqlashicha, o‘g‘rilikni urg‘ochi maymunlarga qaraganda erkaklari tez-tez amalga oshiradi.