Россияликлар Шойгуни истаяпти: Путиннинг рейтинги тушди, Медведевни Навальнийнинг текшируви қулатди

Бутунроссия жамоатчилик фикрини ўрганиш маркази ўтказган навбатдаги сўров Путинга респондентларнинг 49,6 фоизи ишонишини кўрсатди, деб ёзади «Mk.ru».

У жамоатчилик фикри бўйича муқаррар етакчи бўлиб қолмоқда, аммо фақат май ойининг ўзидаёқ 1 фоиз овозларни йўқотди. Унинг рейтинги кўп йиллар давомида биринчи марта 50 фоиздан пасайди. Сергей Шойгу эса бу пайтда 3 фоиз овоз тўплади ва президентдан кейинги иккинчи ўринга чиқиб олди.

Шу билан бир вақтда ишончсизлик рейтинги ҳам тузилди, унда Владимир Жириновский етакчилик қилди, Медведев эса иккинчи бўлди.

Сиёсий технологиялар маркази бош директори Игорь Бунин айтишича, Путиннинг рейтинги абадий баланд бўлиб қолмайди, эртами, кечми, у аста-секинлик билан пасаяди. Аммо Путинга нисбатан ишончнинг пасайиши жиддий бўлмайди, чунки у аҳолининг катта қисми томонидан Россия рамзи сифатида қабул қилинади.

«Шойгуни эса респондентлар у ишонч рамзи бўлгани учун қадрлашади», — деди Бунин. Медведевнинг рейтинги тушиб кетишини эса у Навальний фош қилган кирдикорлар билан боғлади.